Hi nga wula lezvaku a Bhibhiliya gontlhe mahungu ya Nungungulu — niku mahungu ya yena futsi. A Papayi wa hina wa le tilweni i hi nyikile Bhibhiliya kasi gi hi gondzisa. Hi nga wona mahungu yo hlawuleka ma tileko hi ka Nungungulu lawa ma byelilweko vanhu vambiri, kwalomo ka 2000 wa malembe ma hundzileko. Loyi a nga va byela mahungu lawo hi Gabriyeli, a ngilozi leyi yi “yimako mahlweni ka Nungungulu”. (Luka 1:19) Xana a ngilozi leyo yi va byelile mahungu lawo ya lisima ka zviyimo muni?

A mahungu yo sangula ma waya ka Zakariya, a nga hi mupristi wa Jehovha. I byelilwe mahungu lawo kwalomo ka lembe ga wu 3 Mahlweni ka Kristu. Zakariya i wa tshama kwihi a cikhati a nga byeliwa mahungu lawo hi Gabriyeli? I wa tshama le tikweni ga Judha, ka wutshamu ga zvitsunga. A wutshamu legi zvi wonekisa ku khwatsi gi wa hi kusuhani ni le Jerusalema. Ka cikhati leco, Zakariya ni sati wakwe Elizabheti va wa khosahele, niku va wa nga hi na n’wana. Makunu ku wa hi khati ga Zakariya ga ku tira kota mupristi lomu tempeleni ya Nungungulu le Jerusalema — hikwalaho i no nghena a tira. Na a kari, Gabriyeli i no humelela hi citshuketi laha kusuhani ni alati ga libani.

Lezvo zvi mu dzukisile nguvhu, niku i wa hi ni cigelo. Kanilezvi a ngilozi yi no mu tiyiseta yiku: ‘U nga chavi Zakariya; hakuva a cikombelo ca wena ci zwilwe; a sati wa wena Elizabheti i ta ku pswalela [“mufana,” NM] u ta mu chula vito ga ku hi Johani.’ Gabriyeli i no engeta aku Johani ‘i tava wa hombe mahlweni ka Jehovha,’ a tlhela a mu longiselela vanhu. — Luka 1:13-17.

Kanilezvi Zakariya a nga kholwangi. Hikuyini? Hakuva yena ni sati wakwe Elizabheti va wa khosahele. Hikwalaho Gabriyeli i no mu byela lezvi: ‘U tava mbeveve u nga zvi koti ku wulawula, kala ku chikela siku legi lezvi zvi ta nga maheka ha gona, hakuva a wu kholwangi timhaka ta mina.’ — Luka 1:20.

A cikhati leci lezvo zvi nga kari zvi maheka, a vanhu lehandle va wo hlamala ku kasi hikuyini Zakariya a hlwelako ku huma. Hi magumo, Zakariya i no huma lomu tempeleni. Kanilezvi i wa nga ha wulawuli, i wo wulawula hi mawoko basi. A vanhu va no tekela ku zvi pola lezvaku i wonile nchumu wo kala ku toloveleka.

Loku Zakariya a mbhetile ntiro wakwe lomu tempeleni, i no tlhela kaya. Na ku nga se hundza cikhati co leha, Elizabheti i no xura nyimba! A cikhati leci Elizabheti a nga kari a rindzela ku phuluka, i no tshama kaya hi cipimo ca 5 wa tihweti, a nga famba-fambi lomu ka vanhu.

Gabriyeli i no woneka kambe ni mahungu man’wani hi khati ga wumbiri. A mahungu lawa ya khati legi ma waya ka mani? Ma waya ka nhanyana a nga kala a nga se tekwa wa ku hi Mariya, a nga tshama Galileya, le n’walungu wa Jerusalema, lomu dhoropeni ga Nazareta. Zvini a ngilozi leyi yi nga mu byela? Yi te: “U kumile thomo ka Nungungulu.” Yi engeta yiku: ‘U ta xura nyimba, u beleka mufana, u mu chula vito ga ku hi Jesu.’ Yi no tlhela yi wula lezvi xungetano hi Jesu: “I tava wa hombe, i ta vitanwa a ku N’wana wa loyi a nga Hehla-Hehla, . . . i ta fumela yindlu ya Jakobe kala kupindzuka; a mufumo wakwe cima wu nga ta gumelwa.” — Luka 1:30-33.

Handle ko kanakana, Gabriyeli i gi wonile kota thomo ga hombe a ku rumiwa ku ya wula mahungu lawo ya lisima ka vanhu lavo va vambiri! Laha hi to ya hi gondza zvin’wani xungetano hi Johani na Jesu, hi ta zvi zwisisa khwatsi a ku hikuyini a mahungu lawo ma ngata hi ka Nungungulu ma nga hi ya lisima.