Le Mutsuwuka-gambo ku wa hi ni vavanuna vo kari va nga gondza tinyeleti. Va wa kholwa lezvaku a ku hlola va tiva laha a tinyeleti to kari ti nga kona, zvi wa vhuna ku tiva lezvi zvi to humelela munhu wutomini gakwe. (Isaya 47:13) Laha va nga hi le tikweni gabye kwale Mutsuwuka-gambo, va no wona nchumu wo fana ni nyeleti va wu landzela, va famba tikilometro to tala nguvhu kala Jerusalema.

A cikhati leci va nga chikela Jerusalema, va no wutisa lezvi: “Yi kwihi a hosi ya vaJudha leyi yi belekilweko? Hakuva hi wonile a nyeleti ya yona le Mutsuwuka-gambo, hi tile ku ta yi khozela.” — Matewu 2:1, 2.

Herodhi a Hosi ya Jerusalema i no zvizwa, a kwata nguvhu. Hikwalaho, i no vitanisa a murangeli wa vapristi ni varangeli va wukhongeli a ta va wutisa ku Kristu i wa ta pswalelwa kwihi? Va no hlamula hi ku ya hi lezvi a Mitsalo yi nga zvi wulile, vaku: “Hi le Bhetlehema”. (Matewu 2:5; Mika 5:2) Herodhi i no vitana a vagondzi va tinyeleti cihundleni, a va byela lezvi: ‘Fambani mu ya mu lavetela khwatsi a n’wanana loyi; loku mu mu kumile, mu ta ndzi tivisa, kasi minawu ndzi ya mu khozela.’ (Matewu 2:8) Hambulezvo, Herodhi i wa lava ku kuma n’wanana loyi a ta mu daya!

Loku a vagondzi va tinyeleti va sukile, ku no mahela zvilo zvo hlamalisa. Leci co fana ni nyeleti va nga ci wona a cikhati va nga hi le Mutsuwuka-gambo, ci no ranga ci va komba ndlela. Zva dlunyateka ku leyo yi wa nga hi nyeleti yo toloveleka. Kanilezvi, yi wonekile kasi ku va komba ndlela basi. A vagondzi va tinyeleti va no yi landzela kala yi ya nyima hehla ka yindlu yaleyi Josefa na Mariya va nga tshama ka yona ni n’wana wabye.

A cikhati a vagondzi va tinyeleti va nga nghena lomu ndlwini, va no kuma Mariya ni n’wanana — ku wa hi Jesu. A vagondzi va tinyeleti va no khizamela Jesu. Va no mu nyika zvilo zva lisima: ndzalama, ni hlakati ni mira. Laha va nga lava ku tlhela ka Herodhi, Nungungulu i no va byela hi lomu ka noro lezvaku va nga ha tlheli hi kona. Hikwalaho, va no tlhela tikweni gabye hi ndlela yin’wani.

Hi mawonela ya wena, a nchumu lowo wo fana ni nyeleti wu wata hi ka mani? Wu wa ngati hi ka Nungungulu, hakuva a wu tekelangi ku yisa vagondzi va tinyeleti le Bhetlehema, laha Jesu a nga hi kona. Kanilezvi, wu rangile hi ku va yisa Jerusalema, laha va nga ya kumana na Hosi Herodhi, loyi a nga lava ku daya Jesu. Jesu na a delwe futsi hi Herodhi loku Nungungulu i wa nga zvi nghenelangi, a byela vagondzi va tinyeleti lezvaku va nga ha tlheli hi kona. Zva woneka khwatsi a ku ku wa hi Sathani, a nala wa Nungungulu, loyi a nga lava ku daya Jesu! I zamile ku mu daya hi ku tirisa nchumu lowu wa ku fana ni nyeleti.