Jesu i yile a ya kulela Nazareta, ci nga hi cidhoropana ca citsongwani ni co kala ci nga hi ca lisima nguvhu. A cidhoropana leci, ci wa kumeka ka wutshamu ga zvitsunga gi nga vitaniwa ku i Galileya, hi tlhelo ga mutsuwuka-gambo ga tiva ga hombe gi nga vitaniwa ku i Bimbi ga Galileya.

Jesu i tile ka cidhoropana leci na Josefa na Mariya, a cikhati leci va nga wuya hi le Gibhite. Ka cikhati leco, kuzvilava i wa hi ni malembe mambiri. Zvi wonekisa ku khwatsi ka cikhati leco, Josefa na Mariya va wa nga hi na n’wana mun’wani. Hambulezvo, hi kufamba ka cikhati, va no pswala vana van’wani — ku nga Jakobe, na Josefa, na Simoni, na Judha. Josefa na Mariya va no pswala vanhanyana kambe — vontlhe lavo, va wa hi vamakabye va Jesu hi seno ka mamani. Makunu, Jesu i wa hi ni 6 wa vamakabye, kutani ku hundza.

Kota lezvi hi zvi tivako, Jesu i wa hi ni maxaka man’wani. Hi sina hi wulawulile hi Elizabheti ni n’wana wakwe Johani. Va wa hanya kule nguvhu navo — kwale n’walungu, le Judha. A xaka gin’wani ku wa hi titiya wakwe Salome, a nga tshama le Galileya, ku nga hi kusuhani navo. Zvi wonekisa ku khwatsi Salome i wa hi ndzisana ya Mariya. A nuna wa Salome ku wa hi Zabhedhi. Ko khwatsi a vana vabye, Jakobe na Johani, hi vona va ngava vaprimo vo sangula va Jesu. A hi zvi tivi ku Jesu i hlakanile nguvhu ni majaha lawa laha va nga ha kula; kanilezvi i gumesile a tira nguvhu navo, vava cikari ka vapostoli vakwe.

Josefa i wa hi muvatli. Kota lezvi a ngango wakwe wu nga kari wu kula, zvi lavile ku a tira nguvhu kasi a kota ku wu hlayisa. I wa wona Jesu kota n’wana wakwe, a tlhela a mu wundlisa zvezvo. Hikwalaho, Jesu  i wa vitaniwa ku i “n’wana wa muvatli”. (Matewu 13:55) Josefa i mu gondzisile ntiro wa ku vatla Jesu, niku yenawu Jesu i gondzile a wu tiva khwatsi. Hi ndzhako ka cikhati, a vanhu va zile va wula lezvi hi Jesu: “Loyi a hi yena muvatli” ke? — Marku 6:3.

A nchumu wa tshinya laha ngangweni wa Josefa ku wa hi ku khozela Jehovha. Josefa na Mariya va wa ingisa Nayo wa ku gondzisa vana vabye a milayo ya Jehovha ‘lomu ndlwini kabye, ni lomu kuendzeni kabye, ni kuetleleni kabye, ni kuvhukeni kabye’. (Dhewuteronome 6:6-9) Le Nazareta, ku wa hi ni sinagoga. A hi kanakani lezvaku Josefa i wa famba ni ngango wakwe wontlhe va ya khozela Jehovha. Hi ndzhako ka cikhati, Luka i tsalile lezvaku Jesu i ‘nghenile sinagogeni hi siku ga Sabhadho’ kota lezvi a nga tolovela ku maha. (Luka 4:16) Ahandle ka lezvo, Josefa i wa teka ngango wontlhe vaya tempeleni ya Jehovha le Jerusalema lembe ni lembe. Handle ko kanakana, vontlhe va wa tsaka nguvhu hi tipfhumba leto.