Mu “fanele kuva vagondzisi”. (Mah. 5:12) Hi ngazwa a kutsakisa ka zvona! Jehovha — a Mugondzisi wa mu nene a ku hundza vontlhe le tilweni ni laha misaveni — wa hi ramba lezvaku hi gondzisa van’wani xungetano hi yena! Ni cihi ciavelo ca ku gondzisa lisine xungetano hi Jehovha — ku ngava laha ngangweni, lomu bandleni, kutani ntirweni wa simu — i thomo ga hombe niku i ntiro wo bindza. Makunu, hi nga zvi kotisa kuyini a ku wu maha khwatsi a ntiro lowu?

A hlamulo wa kona hi wu kuma ka magezu lawa mupostoli Pawule a nga tsalela Timote, aku: “Simama ku ti tsitsirita u gondzela van’wani, u va nyika wusungukati, ni ku va gondzisa.” I no engeta aku: “Loku u maha lezvo u ta ti ponisa wena u tlhela u ponisa ni lava va ku zwako.” (1 Tim. 4:13, 16) Mandleni ya wena, u na ni mahungu ya ku ponisa wutomi ga vanhu lawa u faneleko ku va bhulela. Hikwalaho, ti karatele ku lera khwatsi ni ku gondzisa khwatsi hakuva zva lisima. A broxura legi gi tsalelwe ku ku vhuna a ku maha lezvo. Hi nga wona a matshamela yo kari ya broxura legi:

Jehovha hi yena a “Mugondzisi wa Hombe”. (Isa. 30:20, NM) A cikhati leci a broxura legi gi lotako a wutlhari ga wena ga kulera ni kugondzisa, u nga rivali lezvaku Jehovha hi yena Cibuka ca mahungu ya hina niku hi yena a kokako vanhu. (Joh. 6:44) Hikwalaho, contlhe cikhati khongela u kombela moya wo basa u tlhela u tirisa a Mhaka ya Nungungulu. Vhuna vanhu va zvi wona lezvaku hi Jehovha a va gondzisako, a hi wena. Ti karatele ku vhuna lava va ku zwako lezvaku va randza Jehovha hi mbilu yabye yontlhe.

U vitanilwe kasi ku ta gondzisa a mahungu ya lisima ku hundza wontlhe lawa a vanhu va tshukileko va ma amukela. A hi kanakani lezvaku loku u ‘tsumba a ntamu lowu wu tako hi ka Nungungulu’, u ta wu maha khwatsi a ntiro lowu. — 1 Ped. 4:11.

Hi hina vagondzisi-kulori,

Hubye yi Fumako ya Vakustumunyu va Jehovha