Kota lezi zi tsalilweko ka 1 Va Le Korinte 6:1-8, mupostoli Paule i wulawulile hi timhaka ta kukecarana xikari ka makholwa-kulobye. I lo kombisa kukhunguvanyeka hi lezi a maKristu yo kari le Korinte ma ngaza ma ‘tiyela a ku kecara munwani mahlweni ka lava va nga lulamangiko.’ (Vesi 1) Paule i lo nyika zigelo zo tiya za kuva a maKristu ma nga faneli ku yisana tihubyeni ta kulamula ta tiko hi kota ya kuphikizana kabye kanilezi ma ku lulamisa nzeni ka bandla. A hi woneni a zigelo zo kari zi seketelako a wusungukati legi gi pimisilweko zonake hi wona kambe a ziyimo zitsongwani lezi zi nga khumbiwiko hi kukongoma hi wusungukati legi.

Loku hi hi ni kuphikizana ko kari ni mukholwa-kulori xungetano hi mabhinzu, a xo ranga hi fanele ku ti karatela a ku lulamisa a xikarato lexo hi ndlela ya Jehova, na ku nga hi ya hina venyi. (Mavingu 14:12) Kota lezi Jesu a zi kombileko, zi chukwana a ku lulamisa a kungazwanani ko kari hi kuhatlisa na ku nga se maha xikarato xa hombe. (Mateu 5:23-26) Hambulezo, lexi xi nga tsakisiko hi lezaku a maKristu yo kari ma kulisa a xikarato, laha ka kuza ma yisa a kuphikizana loko tihubyeni ta kulamula ta tiko. Paule i te ngalo: ‘Loku mu hi ni timhaka xikari ka nwina zi komba lezaku mu na ni gome.’ Hikuyini? A xigelo xa hombe hi lezaku a mamahela lawo ma nga ha chakisa a vito gi nene ga bandla ni Nungungulu loyi hi mu khozelako. Hikwalaho, hi chela nguvu kota hi xiwutiso xa Paule xaku: “Hikuyini mu nga vumeliko a ku onhelwa”? — Vesi 7.

Paule i tlhelile a tlhamusela lezaku Nungungulu i nyikile bandla a lulamiselo gi nene lezaku gi lulamisa kuphikizana. A madota ya bandla vavanuna va mahilweko titlhari hi wutivi ga lisine la Biblia legi va nga nago, niku Paule i ngalo va “zi kota ku lamula xikari ka vamakabye” xungetano hi “timhaka ta loku kuhanya.” (Mavesi 3-5) Jesu i kombile lezaku a kuphikizana ku patsako zihoxo za hombe, zo kota mahlevo ni kukanganyisa, ku fanele ku lulamiswa hi ku lanzela a zigava zinharu: xo sangula, ku mahiwa mizamo ya ku lulamisa a mhaka xikari ka lava vambiri va patsekako, na va hi voce; xa wumbiri, loku a xigava xo ranga xi tsanzeka, a ku nehiwe kustumunyu munwe kutani vambiri; ni xa wunharu,  loku a xigava lexi xa wumbiri xi tsanzeka, a mhaka a yi yisiwe bandleni, ku nga ka madota lawa ma gi yimelako. — Mateu 18:15-17.

Hakunene, a madota ya bandla a hi titlhari ta milayo kutani vamahungani niku a va na xilaveko xa ku tirisa lezo. A ma nyiki milayo ya ku lulamisa a kuphikizana ka za mabhinzu xikari ka vamakabye. Wutshanwini ga lezo, ma hlota tindlela ta ku vuna vontlhe lava va phikizanako lezaku va tirisa Mitsalo va tlhela va chikelela a zwanano hi kurula. Timhakeni to karata, ma nga ha lava ku wutisa zokari ka muwoneleli wa xipanze kutani a hofisa ya ravi ga Timboni ta Jehova. Hambulezo, ku na ni ziyimo lezi zi kalako zi nga patsiwi ka wusungukati ga Paule. Hi zihi a zo kari za ziyimo lezo?

Ka zikhati zo kari, a ku yisa mhaka hubyeni ya kulamula ku ngava xilaveko xo olova xa ku kuma a xiseketelo xa nayo kasi ku maha zilo zi nga hiko za makangwa ni za kurula. Hi xikombiso, a ku yisa mhaka leyo hubyeni ya kulamula ku ngava wona woce a mamahela ma nga kona lezaku a munhu a kuma a phepha gi tiyisako a kutlhatlhiwa ka wukati, ku kuma a fanelo ya ku hlayisa nwanana, ku boha mali ya ku nyika sati kutani nuna anzhako ka ku tlhatlha wukati, ku hakhelwa mali ya maseguro, ku tsalelwa xikari ka lava va wileko mabhinzwini yabye, ku lava ku ti susa nanzu kutani ku tiyisa zigelo. Ku na ni laha kambe a makabye a zi kotako ku tizwa na a kurumeteka a ku yisa mhaka hubyeni ya kulamula kasi a ti vikela ka loyi a mu kecarileko. *

Loku a timhaka leto ti lanzelelwa na ku nga hi na moya wa kuphikizana, za koteka lezaku ti nga tshovi a moya wa wusungukati ga Paule gi pimisilweko. * Hambulezo, a kungo ga muKristu gi fanele kuva ku basisa a vito ga Jehova ni ku hlayisa a kurula ni wumunwe bandleni. A valanzeli va Kristu va tiveka nguvunguvu hi liranzo labye, niku “a liranzo . . . a li ti laveli za lona.” — 1 Va Le Korinte 13:4, 5; Johani 13:34, 35.