CUWUKA Kana na Abeli makunu. Vontlhe va kulile. Kana i lo maha murimi. Yena i pfuna mavele, mihanzu ni matsawu.

Abeli i lo maha murisi wa tiyivu. Yena i ranza ku hlayisa tiyivana. Tona ti kula ti maha tiyivu ta hombe, niku hi xikhatanyana Abeli i kumeka a hi ni ntlhambi wa tiyivu a ku wu hlayisa.

Siku go kari Kana na Abeli va neha munyikelo ka Nungungulu. Kana i neha zakuga zo kari a nga pfuna. Kasi Abeli i neha yivu yakwe ya chukwana. Jehova i xalala hi Abeli ni munyikelo wakwe. Kanilezi a nga xalali hi Kana ni munyikelo wakwe. Wa zi tiva a ku hikuyini?

A hi ku a munyikelo wa Abeli wu wahi wa chukwana ku hunza wa Kana. Hi lezaku Abeli munhu wa mu nene. Yena i ranza Jehova ni nakulobye. Kanilezi Kana i bihile; a nga ranzi nakulobye.

Hizalezo Nungungulu i byela Kana lezaku a hunzulusa kupima kakwe. Kanilezi Kana a nga ingisi. Yena i zangara nguvu hakuva Nungungulu i ranza nguvu Abeli. Hizalezo Kana i byela Abeli aku: ‘A hiye sinwini.’ Laha na va hi voce kwaseyo, Kana iba nakulobye Abeli. Yena i muba hi ntamu laha ko kala a mu daya. Ku wa nga hi nchumu wo tshisa lowo ku mahiwa hi Kana?

Hambulezi Abeli a fileko, Nungungulu wa ha simama ku mu alakanya. Abeli i wa hi mu nene, niku Jehova cima a nga rivakelwi hi munhu wo khwatsi hi loye. Siku go kari Jehova Nungungulu i ta maha lezaku Abeli a tlhela a hanya. Xikhatini lexo Abeli cima a nga ta hafa. Yena i ta hanya laha misaveni kala kupinzuka. Zi wa nga ta ngha zi sasekile ku tiva vanhu vo kota Abeli?

Kanilezi Nungungulu a nga xalali hi vanhu vo kota Kana. Anzhako kaku Kana a dele nakulobye, Nungungulu i mu tsayisile hi ku mu yisa kule ka wontlhe ngango wakwe. Laha Kana a nga ya hanya ka xinwani xipanze xa misava, i lo teka munwe wa vamakabye vakwe va xisati, na yena i lo maha sati wakwe.

Hi kufamba ka xikhati, Kana ni sati wakwe va lo sangula kuva ni vana. Vanwani vafana ni vanhanyana va Adamu na Eva va lo tekana, niku na vonawu va lo pswala vana. Hi xikhatanyana ku lo kumeka vanhu vanyingi misaveni. A hi gonzeni hi vo kari.