LAHA a vanhu va nga sangula ku engetelekana misaveni, vanyingi va vona va lo maha zilo zo biha kota Kana. Kanilezi wanuna munwe i wa hambene na vona. Wanuna loye i wa vitwa a ku hi Enoki. Enoki i wa hi wanuna wo tiya-hlana. A vanhu va nga mu ranzele va wa maha zilo zo biha nguvu, kanilezi Enoki i lo simama ku tirela Nungungulu.

Wa zi tiva a ku hikuyini vanhu va xikhati lexo va nga maha zilo zinyingi zo biha? Ina, alakanya, Himani a nga maha lezaku Adamu na Eva va nga ingisi Nungungulu niku vaga hanzu lowu Nungungulu a nga te ngalo va nga wugi? Hizona, kuve ngelosi yo biha. A Biblia gi yi vitana a ku hi Satani. Yena i zama ku maha lezaku vanhu vontlhe va biha.

Siku go kari Jehova Nungungulu i lo ruma Enoki a ku ya byela vanhu lezi va nga kala va nga zi lavi ku zizwa. Ku wa hi lezi: ‘Siku go kari Nungungulu i ta lovisa vontlhe vanhu vo biha.’ Kuzilava a vanhu va lo zangara nguvu hi kuzwa lezo. Za koteka ku ngha vona kambe va ringile ku daya Enoki. Hikwalaho Enoki i wa fela ku tiya nguvu hlana kasi ku byela vanhu lezi Nungungulu a nga wa ta maha.

Nungungulu a nga tsikangi Enoki a hanya xikhati xo leha xikari ka vanhu lavo vo biha. Enoki i lo hanya 365 wa malembe ntsena. Hikuyini hi nge “365 wa malembe ntsena”? Hakuva a vanhu masikwini lawo va wa tiyile nguvu ku hunza lezi niku va wa hanya xikhati xo leha. Hizalezo, Metusela, n’wana Enoki, i lo hanya 969 wa malembe!

Ina, anzhako ka kufa ka Enoki, a vanhu va loya mahlweni hi kubiha. A Biblia gi ngalo ‘a mixuvo ya timbilu tabye yi wa bihile masiku wontlhe,’ niku a ‘misava yi lo tala hi tihanyi.’

Wa xi tiva xigelo xa kuva kona kuxaniseka kunyingi misaveni masikwini lawo? Hi kota ya ku Satani i lo kuma ndlela yiswa ya ku maha lezaku vanhu va tira zilo zo biha. Lezo hi ta zi gonza xikhatini xi tako.