CUWUKA misava laha! A hi kusaseka ka zilo lezi zontlhe! Cuwuka a byanyi ni tisinya, zitsangi ni zihari zontlhe. Xana wa yi tiva aku hi yihi ndlovu ni tinghala?

Gi kumekisile kuyini a simu legi go saseka? A hi woneni lezi Nungungulu a nga hi longiselisisa zona a misava.

A kusangula, Nungungulu i lo maha lezaku a byanyi go nyuka gi fenengeta misava. A tlhela a maha tontlhe tixaka ta matsawu, tisinya ta titsongwani ni ta hombe. A zilo lezo zi vuna ku sasekisa misava. Kambe zi maha zo hunza lezo. Zinyingi za kona zi hi nyika zakuga zo nanziha nguvu.

Hi nzhako Nungungulu i lo maha tinjhanjhi kasi ti hlambela matini ni zinyanyani kasi zi puruma ndengelengeni. I lo maha timbyana ni zimanga ni mahaxi; zihari za hombe ni za zitsongwani. Hi zihi zihari zi hanyako kusuhani ni muti wa wena? Hi wa nga ta tsaka hi lezi Nungungulu a hi maheleko zontlhe zilo lezo?

Hi kugumesa, Nungungulu i lo maha xipanze xo kari xa misava xiva wutshamu go hlawuleka nguvu. I lo xi vitana a ku i simu ga Edeni. Gi wa mbhelele. Zontlhe zi wa sasekile. Kambe Nungungulu i wa lava lezaku yontlhe misava yi fanana ni simu legi go saseka a nga gi mahile.

Kanilezi tlhela u cuwuka mufananiso wa simu legi. Wa zi tiva lezi Nungungulu a nga zi wona na zi kiyela? A hi woneni.