NOA i wa hi ni sati ni vana vanharu va vafana. A mavito ya vana vakwe ma wa hi Xemi, Hamu na Jafete. Kambe munwe ni munwani wa vana lavo i wa hi ni sati. Hizalezo, ku wa hi ni ntlhanu wa vanhu ni vanharu ngangweni wa Noa.

Makunu Nungungulu i lo ruma Noa ku maha ntiro wu nga tolovelekangiko. Yena i lo mu byela a ku aka taru ga hombe. A taru lego gi wa anamile ku khwatsi xitimela xa mati, kanilezi gi wa fana nguvu ni bhokisa ga hombe, go leha. Nungungulu i te ngalo: ‘Maha zitezi zinharu ni makwarutu nzeni ka gona.’ A makwarutu ma wa hi ya Noa ni ngango wakwe, zihari ni kuga loku vontlhe va nga wa ta ku lava.

Nungungulu kambe i lo byela Noa a ku maha taru hi ndlela ya ku gi nga vuti. Nungungulu i te ngalo: ‘Nzi ta rumela ntalo wa hombe wa mati nzi lovisa yontlhe misava. Vontlhe lava va nga hiko lomu tarwini va tafa.’

Noa ni vana vakwe va lo ingisa Jehova va sangula ku aka. Kanilezi a vanhu vanwani va lo hleka. Va lo simama ku maha zo biha. Ni munwe a nga kholwangi loku Noa a va byelile lezi Nungungulu a nga wa ta zi maha.

Ku hunzile xikhati xo leha na taru gi akiwa hakuva gi wa hi ga hombe nguvu. Anzhako ka malembe yo hlaya gi lo mbhela. Makunu Nungungulu i lo byela Noa a ku neha zihari nzeni ka taru. Nungungulu i lo mu leletela a ku neha hi mipatswa a tixaka to kari ta zihari, matsune ni kati. Kanilezi a ka tinwani tixaka ta zihari, Nungungulu i lo mu byela a ku neha hi ntlhanu ni zimbiri. Nungungulu kambe i lo byela Noa a ku neha tontlhe tixaka ta tinyanyani. Noa hakunene i lo maha lezi Nungungulu a nga wulile.

Hi kugumesa, Noa ni ngango wakwe va lo enghenawu tarwini. Anzhako Nungungulu i lo vala livati. Noa ni ngango wakwe va lo rinzela lomu nzeni. Ti alakanyele na u hi lomu tarwini na vona, na mu rinzela. Ku wa tava kona a ntalo hakunene kota lezi Nungungulu a nga wulile?