WONA lezi zi mahekako zalezi. Adamu na Eva vo humesiwa lomu sinwini go saseka ga Edeni. Wa zi tiva a ku hikuyini?

Hi lezaku va lo maha zo biha nguvu. Hikwalaho Jehova o va tsayisa. Wa zi tiva lezi Adamu na Eva va nga maha?

Va lo maha lezi Nungungulu a nga va byelile a ku nga mahi. Nungungulu i wa va byelile a ku va ngaga mihanzu ya tisinya lomu sinwini. Kanilezi Nungungulu i wa va leletele a ku ngagi mihanzu ya yinwe ya tisinya kasi va ngafi. I wa ti hlayisele sinya leyo kota yakwe. Ha zi tiva ku zi bihile ku teka nchumu wu lumbako munwani, a hi zona? Kasike, zini zi nga maheka?

Hi siku go kari na Eva a hi yece lomu sinwini, a nyoka yo kari yi lo wulawula naye. Alakanyela lezo! Yona yi lo byela Eva a kuga hanzu wa sinya leyi Nungungulu a nga va layile a ku nga yigi. Loku Jehova a mahile tinyoka a nga ti mahelangi ku wulawula. Lezi zi komba lezaku i wa hi kona loyi a nga maha nyoka yi wulawula. Ku wa hi mani?

Ku wa nga hi Adamu. Ku wa tava munwe wa vanhu lava Jehova a nga va mahile kale na a nga se ku maha misava. Vanhu lavo tingelosi, hi nga zi kotiko ku va wona. A ngelosi leyo yi lo ti kukumukisa nguvu. Yi lo sangula ku alakanyela kuva mufumeli kota Nungungulu. Niku yi wa lava lezaku vanhu va ingisa yona wutshanwini ga ku ingisa Jehova. Hi yona ngelosi leyi yi nga maha lezaku a nyoka yi wulawula.

A ngelosi leyo yi zi kotile ku kanganyisa Eva. Laha yi nga mu byela a ku i wa ta fana na Nungungulu loku aga hanzu lowo, yena i lo kholwa. Hizalezo i loga, Adamu na yenawu. Adamu na Eva a va ingisangi Nungungulu. Hi ku maha loko va lo luza a muti wabye wu nga hi simu go saseka.

Kanilezi gata siku legi Nungungulu a to maha lezaku yontlhe misava yi saseka ku fana ni simu ga Edeni. Anzhako hi ta tiva a ku u nga hlengelisa kuyini ka lezo. Kambe zalezi, a hi woneni lezi zi nga humelela Adamu na Eva.