LAHANDLE ka taru, a vanhu va wa tira za wutomi gabye a ku khwatsi hi lezi va nga sina va zi maha. Vona va lo simama a ku nga kholwi lezaku a Ntalo wu wa tata. Za koteka ku ngha va hlekile ku hunza xinwani xikhati. Kanilezi hi xikhatanyana va lo tsika ku hleka.

Hi xitshuketi a mati ma lo sangula kuna. Ma lona kusukela le tilweni a ku khwatsi hi loku u halata mati hi lomu ka bhaketi. Noa i wa wulile za lisine! Kanilezi a xikhati xi wa nga ha hi kona kasi munwani kambe a enghena tarwini. A livati li wa valilwe khwatsi hi Jehova.

Hi xikhatanyana yontlhe minzhelelo yi lo fenengetiwa. A mati ma lo maha ku khwatsi micongo ya hombe. Ma lo wisa tisinya ni ku wumbuluta maribye ya hombe, ma tlhela ma vanga guwa ga hombe. A vanhu va lo chava. Va noma zitsungeni. O, lezi va nga xuvisa zona a ku ngha va ingisile Noa ni ku enghena tarwini na livati la ha vululelwe vona! Kanilezi, xi wa nga ha hi kona xikhati makunu.

A mati ma lo simama ku tlakuka. Wona ma lona hi le tilweni a 40 wa masiku ni 40 wa wusiku. Ma lo kwela zitsunga, niku hi xikhatanyana hambu zitsunga zo leha nguvu zi lo fenengetiwa. Kota lezi Nungungulu a nga wulile, a vanhu ni zihari va nga hi handle ka taru va lofa. Kanilezi vontlhe va nga hi nzeni va lo pona.

Noa ni vana vakwe va wa mahile ntiro wu nene hi ku aka taru. A mati ma lo gi tlakusa, gi deluka hehla ka wona. Kasike hi siku go kari, na vula yi nyimile a kuna, a gambo gi lo sangula ku woninga. Kuwoneka muni ku nga hi kona! Wontlhe matlhelo ku wa hi bimbi ga hombe. Lexi ntsena xi nga koteka ku woniwa i taru gi nga deluka hehla ka bimbi.

Xikhatini lexo a zihotlovila zi wa lovile. Zi wa nga ha hi kona kasi ku bayisa vanhu. Zontlhe zi wa file zinwe ni vamamani va zona ni vontlhe vanhu vo biha. Kanilezi zini zi nga maheka ka vararu va zona?

Hi lisine a vararu va zihotlovila lezo va wa nga hi vanhu vo fana na hina. Va wa hi tingelosi ti nga relele kasi ku ta hanya kota vanhu misaveni. Hizalezo, laha a Ntalo wu nga chikela, tona a ti fangi zinwe ni vanhu vanwani. Ti lo tsika mimiri ya vanhu ti nga yi mahile, ti tlhelela tilweni kota tingelosi. Kanilezi a ta ha vumelwangi ku maha xipanze xa ngango wa tingelosi ta Nungungulu. Hizalezo, tona ti lo maha tingelosi ta Satani. Lomu ka Biblia ti vitanwa a ku madimoni.

Makunu Nungungulu i lo maha moya wu pupuxa, a mati ya ntalo ma sangula ku bohla. Anzhako ka ntlhanu wa tihweti a taru gi lo ya yima hehla ka xitsunga. Na ku hunzile masiku yo tala lava va nga hi lomu tarwini va wa zi kota ku cuwuka handle va wona hehla ka zitsunga. A mati ma wa simama ku bohla.

Hizalezo Noa i lo humesa handle ka taru a nyanyani ya ntima yi vitwako a ku xikunguwa. Xona xi lo haha xikhati xo kari zonake anzhako xi lo tlhela xi wuya, hakuva a xi kumangi wutshamu ga gi nene go khapama kona. Xi lo simama ku maha lezo, xi wuya kambe ni kambe xi ta humula hehla ka taru.

Noa i wa lava ku wona a ku a mati ma wa bohlile misaveni, hikwalaho yena i lo humesa tuva handle ka taru. Gonawu gi lo wuya hakuva a gi kumangi laha ko tshama kona. Noa i lo gi rumela hi khati ga wumbiri, gi ya wuya ni tluka ga oliva nonwini wa gona. Hizalezo Noa i lo tiva lezaku a mati ma wa bohlile. Noa i lo gi rumela hi khati ga wunharu, kambe lezi gi lo ya kuma wutshamu go woma gi hanya kona.

Hikwalaho Nungungulu i lo byela Noa, aku ngalo: ‘Huma tarwini. Teka ngango wa wena wontlhe ni zihari.’ Vona va wa tshamile xikhati xo hunza lembe lomu tarwini. Ha zi kota ku alakanyela a litsako leli vontlhe va nga hi nalo hi ku tlhela va huma handle ni kuva va ponile!