WA ZI wona lezi Abrahama a mahako laha? I na ni mukwana, kambe ko khwatsi i lava ku daya n’wana wakwe. I wa ta maha lezo hikuyini? Kusangula a hi woneni lezi Abrahama na Sara va nga kumisa zona n’wana.

Khumbula, Nungungulu i wa va tsumbisile lezaku va wa tava ni n’wana. Kanilezi, lezo zi wa ku khwatsi zi wa nga ta koteka, hakuva Abrahama na Sara va wa khosahele nguvu. Hambulezo, Abrahama i wa kholwa lezaku Nungungulu wa zi kota ku maha lezi zi ngo khwatsi a zi koteki. Kasike zini zi nga maheka?

Ku hunzile lembe na Nungungulu a mahile xitsumbiso xakwe. Kasi laha Abrahama a nga hi ni 100 wa malembe na Sara a hi ni 90 wa malembe, va lova ni n’wana wa mufana a vitwako Isaka. Nungungulu i wa hlayisile xitsumbiso xakwe!

Kanilezi, laha Isaka a nga kulile, Jehova i lo ringa kukholwa ka Abrahama. Yena i lo vitana: ‘Abrahama!’ Abrahama i lo hlamula: ‘Nzi laha!’ Anzhako Nungungulu aku ngalo: ‘Teka n’wana wa wena, n’wana wa wena wa munwe, Isaka, uya ka xitsunga lexi nzi ta nga ku komba. Kwaseyo u ta daya n’wana wa wena u mu nyikela kota muphahlelo.’

A timhaka leto ti wa karata nguvu Abrahama, hakuva Abrahama i wa ranza nguvu n’wana wakwe. Kambe khumbula, Nungungulu i wa tsumbisile lezaku a vana va Abrahama va wa ta hanya tikweni ga Kanani. Kasi zi wa ta mahekisa kuyini lezo na Isaka a file? Abrahama i wa nga zi pimi, kanilezi i lo simama a ingisa Nungungulu.

Loku a chikele xitsungeni, Abrahama i lo boha Isaka a mu tlhateka alatini a nga gi mahile. Anzhako i lo humesa mukwana kasi ku daya n’wana wakwe. Hi xalexo xikhati a ngelosi ya Nungungulu yi lo vitana: ‘Abrahama, Abrahama!’ Abrahama i lo hlamula: ‘Nzi laha!’

Nungungulu aku ngalo: ‘U nga tlhavi mufana hambu ku mu maha nchumu. Makunu nza zi tiva lezaku wa kholwa ka mina, hakuva a wu nzi alelangi n’wana wa wena, n’wana wa wena wa munwe.’

Hi nga wona kukholwa ka hombe loku Abrahama a nga hi nako ka Nungungulu! Yena i wa kholwa lezaku a ku na nchumu wu tsanzako Jehova, niku Jehova i wa ta vuxa Isaka hi ka vafileko. Nungungulu hakunene i wa nga lavi lezaku Abrahama a daya Isaka. Hizalezo Nungungulu i lo maha lezaku a hamba yo kari yi khwekela likwareni li nga hi kusuhani, a byela Abrahama a ku tlhava yona wutshanwini ga n’wana wakwe.