WA MU zwela wusiwana wanuna loyi a babyako? A vito gakwe hi Joba, ni wasati loyi i sati wakwe. Wa zi tiva lezi a byelako Joba? ‘Rukatela Nungungulu, ufa.’ A hi woneni a ku hikuyini yena a ngaza a wula nchumu wo khwatsi hi lowo, niku hikuyini Joba a xanisekileko nguvu.

Joba i wa hi wanuna wo tsumbeka a nga ingisa Jehova. Yena i wa hanya tikweni ga Uzi, gi nga hiko kule ni le Kanani. Jehova i wa ranza nguvu Joba, kanilezi ku wa hi kona wo kari a nga mu venga. Wa mu tiva a ku himani?

Ku wa hi Satani Diyabu. Khumbula, Satani hi yena ngelosi yo biha leyi yi vengako Jehova. I zi kotile ku maha lezaku Adamu na Eva va nga ingisi Jehova, niku yena i wa pimisa lezaku i wa ta zi kota ku maha lezaku vontlhe vanhu vanwani va nga ingisi Jehova na vonawu. Xana i zi kotile? Ahihi. Ntsena alakanya a vavanuna ni vavasati vo tala vo tsumbeka lava hi gonzileko ha vona. Vangani u zi kotako ku wula a mavito yabye?

Anzhako ka kuva Jakobe na Josefa va file le Gipite, Joba i wa hi munhu loyi a nga tsumbekile nguvu ka Jehova a ku hunza vontlhe misaveni. Jehova i wa lava ku tivisa Satani a ku yena i wa nga ta zi kota ku maha lezaku vontlhe vanhu va biha, hizalezo i te ngalo: ‘Cuwuka Joba. Wona lezi a tsumbekisileko zona ka mina.’

Satani i lo hlamula, aku: ‘I tsumbekile, hakuva wa mu katekisa niku i na ni zilo zo tala za zi nene. Kanilezi loku u zi susa, i ta ku rukatela.’

Hizalezo Jehova i te ngalo: ‘Yana mahlweni. Zi suse. Maha kontlhe kubiha loku u ku lavako ka Joba. Hi ta zi wona a ku xana i ta nzi rukatela ke. Ntsena lezaku u nga mu dayi.’

A kusangula, Satani i lo rumela vavanuna a ku ya yiva a tihomu ni makameli ya Joba, ni tiyivu takwe ti lo dawa. Makunu yena i lo daya vana vakwe va xinuna ni va xisati va 10 hi bhubhutsa. Hi kulanzela, Satani i loba Joba hi wubabyi legi go chavisa. Joba i lo xaniseka nguvu. Kuve hi kota ya lezo sati wa Joba a nga mu byela ku ngalo: ‘Rukatela Nungungulu, ufa.’ Kanilezi Joba a nga mahangi lezo. Kambe, a vanghana vanharu va nga hiko va nene va lota va ta mu byela a ku yena i wa hanyile wutomi ga hava. Kanilezi Joba i simamile a tsumbekile.

Lezo zi tsakisile nguvu Jehova, niku anzhako i lo katekisa Joba, kota lezi u zi wonako laha ka mufananiso. Yena i lo mu hanyisa hi ka wubabyi gakwe. Joba i lova ni vanwani vana vo saseka va 10, ni tihomu, tiyivu ni makameli yo tala ma wuyetilweko kumbiri ka lawa a nga hi nawo kusanguleni.

U ta simama ku tsumbeka ka Jehova kota Joba? Loku u maha lezo, Jehova i ta ku katekisa na wenawu. U ta zi kota ku hanya kala kupinzuka loku misava yontlhe yi sasekisilwe ku fana ni simu ga Edeni.