VAFANA lava va vambiri laha va hambene, a hi zona? Wa ma tiva mavito yabye? A muhloti hi Esau, kasi loyi a risako tiyivu hi Jakobe.

Esau na Jakobe va wa hi mahahla ya Isaka na Rebeka. A raru wabye, Isaka, i wa ranza nguvu Esau, hakuva i wa hi muhloti wa mu nene a nga wuya ni zakuga laha mutini. Kanilezi Rebeka i wa ranza nguvu Jakobe a ku hunza Esau, hakuva Jakobe i wa hi mufana wo rula.

Kokwani wabye Abrahama i wa ha hanya. Kambe ha zi kota ku alakanyela lezi Jakobe a nga ranzisa zona a ku mu ingisela na a wulawula hi Jehova. Hi kugumesa Abrahama i file na a hi ni 175 wa malembe, na mahahla ma hi ni 15 wa malembe.

Laha Esau a nga hi ni 40 wa malembe i lo teka vavasati vambiri va tiko ga Kanani. Lezo zi karatile nguvu Isaka na Rebeka, hakuva a vavasati lavo va wa nga khozeli Jehova.

Siku go kari ku lo humelela nchumu lowu wu nga maha Esau a zangarela nguvu nakulobye Jakobe. Ku lo chikela xikhati xa ku Isaka a nyika xikatekiso ka n’wana wakwe wa nhonzwa. Kota lezi Esau a nga hi nhonzwa ka Jakobe, Esau i wa rinzela ku amukela xikatekiso lexo. Kanilezi Esau i wa sina a xavisele Jakobe a fanelo ya ku amukela xikatekiso. Kambe, xikhatini xa kupswaliwa ka vafana lava va vambiri Nungungulu i wa wulile ku ngalo Jakobe i wa ta amukela a xikatekiso lexo. Lezo hi zona zi nga maheka. Isaka i lo nyika xikatekiso ka n’wana wakwe Jakobe.

Anzhako ka xikhati, loku Esau a zi tivile i lo zangarela Jakobe. Yena i lo zangara nguvu laha ko tlhela aku i wa ta daya Jakobe. Loku Rebeka a zwile zilo lezo, i lo karateka nguvu. Rebeka i lo byela nuna wakwe Isaka: ‘Ku tava hlomulo loku Jakobe a teka munwe wa vavasati lava va Kanani.’

Hizalezo Isaka i lo vitana n’wana wakwe Jakobe aku ngalo: ‘U nga teki wasati wa Kanani. Kanilezi famba mutini wa kokwani wa wena Betueli, le Harani. Teka munwe wa vanhanyana va n’wana wakwe Labani.’

Jakobe i lo ingisa raru wakwe, a tekela ku sangula a pfhumba gakwe ga hombe ga kuya lomu ku nga hanya maxaka yakwe, le Harani.