WONA ngango lowu wa hombe. Lava i vana va Jakobe va vafana va khume ni vambiri. Yena kambe i wa hi ni vana va vanhanyana. Wa ma tiva mavito ya vo kari va kona? A hi va tiveni.

Lea i lo pswala Rubeni, Simeoni, Levi na Juda. Loku Rakeli a wonile lezaku i wa nga kumi n’wana, i lo bayiseka nguvu. Hizalezo, i lo nyikela Bilha, nanza gakwe ga xisati, ka Jakobe, na Bilha i lova ni vana vambiri va vafana va vitwako Dani na Naftali. Makunu Lea i lo nyikelawo Zilpa, nanza gakwe ga xisati, ka Jakobe, na Zilpa i lo pswala Gadi na Axeri. Hi kugumesa Lea i lova ni vana vambiri kambe va vafana, Isakari na Zebuloni.

Kasike Rakeli i zile ava ni n’wana. I lo mu chula vito ga ku hi Josefa. Anzhako hi ta tiva zo tala ha Josefa, hakuva i lo maha munhu wa hombe nguvu. Lava hi vona vana va vafana va 11 va nga pswalelwa Jakobe na a hanya zinwe na Labani, raru wa Rakeli.

Jakobe kambe i lova ni vana va vanhanyana, kanilezi a Biblia gi wula vito ga munwe wa vona ntsena. A vito gakwe ku wa hi Dina.

Ku lo chikela xikhati laha Jakobe a nga alakanyela ku tsika Labani a tlhela Kanani. Hikwalaho i lo tlhanganyisa ngango wakwe wa hombe ni mitlhambi yakwe ya hombe ya tiyivu ni tihomu a sangula pfhumba lego ga hombe.

Xikhatanyana nzhako ka ku Jakobe ni ngango wakwe va tlhelile Kanani, Rakeli i lo pswala munwani n’wana wa mufana. Lezo zi mahekile na va hi pfhumbeni. A kuhefemula ka Rakeli ku wa tsanza, hizalezo i lofa na a hi kuhefemuleni. Kanilezi a nwanana loye wa mufana i hanyile. Jakobe i lo mu chula vito ga ku hi Benjamini.

Hi lava ku alakanya mavito ya vana va Jakobe va vafana va 12 hakuva a tiko gontlhe ga ka Israeli gi humile hi ka vona. Hi lisine, a tixaka ta ka Israeli ta 12 ti na ni mavito ya 10 wa vana va Jakobe va vafana, ni vambiri va Josefa. Isaka i hanyile malembe yo tala anzhako ka kuva vontlhe vafana lavo va pswalilwe, niku zi ngava zi mu tsakisile a kuva ni vazukulu vo tala. Kanilezi a hi woneni lezi zi nga humelela Dina, zukulu wakwe wa xisati.