MOSI i lota xitsungeni xa Horebe kasi ku ta kuma byanyi go gisa tiyivu takwe. Laho i lo wona xihlahla na xi kari xi vura nzilo, kanilezi na xi nga mbheli!

Mosi i lo pimisa lezi, aku: ‘Lezi za hlamalisa. Nzi ta tshinela kasi nzi zi wona khwatsi.’ Loku a tshinele, ku lo huma gezu hi lomu xihlahleni, giku: ‘U nga tshineli laha. Susa zilato mikonzweni ya wena, hakuva a wutshamu legi u yimileko ka gona wutshamu go basa.’ Ku wa hi Nungungulu a nga kari a wulawula hi ku tirisa a ngelosi, hizalezo Mosi i lo fenengeta a nghohe yakwe.

Makunu Nungungulu i te ngalo: ‘Nzi wonile kuxaniseka ka vanhu va mina le Gipite. Kambe nzi lava ku va tlhatlhisa, niku wena u loyi nzi mu rumelako a ku humesa vanhu va mina hi le Gipite.’ Jehova i wa ta neha vanhu vakwe tikweni go saseka ga Kanani.

Kanilezi Mosi i te ngalo: ‘A nzi wa nchumu. Nzi nga zi kotisa kuyini ku maha lezo ke? Inaka pimisa ku ngalo nza famba. A vaIsraeli va taku ka mina, “Himani a nga ku ruma?” Nzi ta kuyini makunu?’

Nungungulu i lo hlamula aku: ‘U ta va byela lezi, “JEHOVA Nungungulu wa Abrahama, Nungungulu wa Isaka ni Nungungulu wa Jakobe i nzi rumile ka nwina.”’ Jehova i lo engeta aku: ‘Legi hi vito ga mina kala kupinzuka.’

Mosi i lo hlamula, aku: ‘Kanilezi pimisa ku ngalo va nga ta nzi kholwa loku nzi wula a ku u nzi rumile.’

Zonake Nungungulu i lo wutisa, aku: ‘Xini lexi xi nga lomu canjeni ga wena?’

Mosi i lo hlamula: ‘I nhonga.’

Nungungulu aku ngalo: ‘Yi hoxe lahasi.’ Laha Mosi a nga yi hoxa, a nhonga yi lo su hunzuluka yi maha nyoka. Nungungulu makunu i lo komba Mosi xinwani xihlamaliso. Yena i te ngalo: ‘Nghenisa canja ga wena lomu nguweni ya wena.’ Mosi i lo gi nghenisa, laha a nga humesa canja gakwe, gi wa basile ku khwatsi i gapongo! A canja gi wa ku khwatsi gi wa nghenelwe hi wubabyi legi gi vitwako a ku i hlokonho. Hi kulanzela Jehova i lo nyika Mosi a ntamu wa ku maha xihlamaliso xa wunharu. Hi kugumesa yena i te ngalo: ‘Loku u maha zihlamaliso lezi a vaIsraeli va ta kholwa a ku mina nzi ku rumile.’

Anzhako ka lezo Mosi i yile kaya a ya ku ngalo ka Jetro: ‘Maha wuxinji u nzi vumela nzi tlhela ka maxaka ya mina le Gipite nzi ya tiva kuhanya kabye.’ Zonake Jetro i lo salisana na Mosi, niku Mosi i lo sangula pfhumba gakwe go tlhelela Gipite.