WONA lezi wanuna loyi a kelelako lomu tendeni gakwe! I nguwo yo saseka, ni muhomo wa nzalama ni zingerengere za siliva. Yena i zi tekile le doropeni ga Jeriko. Kasi zini zi nga fanele ku mahiwa hi zilo za Jeriko? Wa zi alakanya?

Zi wa fanele ku loviswa, a nzalama ni siliva zi wa ta nyikelwa xikhwameni xa tabernakeli ga Jehova. Hikwalaho a vanhu lava a va ingisangi Nungungulu. Va yivile lezi zi lumbako Nungungulu. A vito ga wanuna loyi hi Akana, ni lava va nga naye va lumba ngango wakwe. A hi woneni lezi zi mahekako.

Anzhako ka ku Akana a yivile lezi zilo, Joxua i rumela vavanuna vo kari a ku yalwa ni doropa ga Ai. Kanilezi vona va hluliwa le yimpini. Vo kari va dawa, vanwani va tsutsuma. Joxua i zangara nguvu. Yena i barama na nghohe yakwe yi hi lahasi a khongela ka Jehova: ‘Hikuyini u tsikileko lezi zilo zi maheka ka hina ke?’

Jehova a hlamula: ‘Vuka! Israeli i onhile. Va tekile zilo zo kari za lezi zi nga fanele ku loviswa kutani ku nyikelwa ka tabernakeli ga Jehova. Va yivile nguwo yo saseka va yi fihla. Nzi nga ta mu katekisa kala mu yi lovisa, zinwe ni loyi a tekileko zilo lezo.’ Jehova i ngalo i ta tivekisa wanuna loye wo biha ka Joxua.

Hizalezo Joxua i tlhanganyisa a vanhu vontlhe, zonake Jehova a tivekisa a wanuna wo biha, Akana. Akana aku ngalo: ‘Nzi onhile. Nzi lo wona a nguwo yo saseka, ni muhomo wa nzalama ni zingerengere za siliva. Nzi lo zi navela nguvu laha ka kuza nzi zi teka. Mu ta ya zi kuma zi kelelwe lomu nzeni ka tenda ga mina.’

Laha a zilo lezo zi kumiwako zi tlhela zi nehiwa ka Joxua, yena i ngalo ka Akana: ‘Hikuyini u hi neheleko xanisa ke? Makunu Jehova i ta ku tiselawu xanisa!’ Hizalezo a vanhu vontlhe va gandla Akana ni ngango wakwe hi maribye kala vafa. Xana lezo a zi kombi lezaku cima a hi faneli ku teka zilo zi nga hi lumbiko ke?

Anzhako ka lezo Israeli i huma a ku yalwa kambe ni Ai. A ka lexi xikhati Jehova i vuna vanhu vakwe, vona va hlula a yimpi.