LOKU vaIsraeli va enghena kuxanisekeni, va rilela Jehova. Zonake Jehova i va hlamula hi ku va nyika varangeli va tinhenha kasi ku va vuna. A Biblia gi vitana varangeli lavo a ku valamuli. Joxua ive mulamuli wo sangula, ni vanwani valamuli va ngave kona anzhako ka yena va wa vitwa a ku hi Otnieli, Ehudi na Xamgare. Kanilezi a vanhu vambiri va lava va vunako Israeli vavasati va vitwako Debora na Jaeli.

Debora muprofeti wa xisati. Jehova i mu nyika mahungu xungetano hi wumanziko, na yena i byela vanhu lezi Jehova a wulako. Debora kambe mulamuli. Yena i tshama lahasi ka sinya yo kari ya cinzu le zitsungeni, ni vanhu va mu tela a ku ta vuniwa zikarato zabye.

A ka xikhati lexi a hosi ya Kanani hi Jabina. Yena i na ni 900 wa tikareta ta yimpi. A butho gakwe gi na ni ntamu nguvu laha kaku a vaIsraeli vo tala va zile va kurumetwa a ku maha malanza ya Jabina. A nduna ya butho ga Hosi Jabina i vitwa a ku hi Sisera.

Hi siku go kari Debora i vitanisa mulamuli Barake, a mu byela ku: ‘Jehova i te ngalo: “Teka a 10.000 wa vavanuna u va yisa Xitsungeni xa Tabora. Kwaseyo nzi ta nyikela Sisera ka wena. Nzi ta tlhela nzi ku nyika kuhlula hehla ka yena ni ka butho gakwe.”’

Barake aku ngalo ka Debora: ‘Nzi ta famba loku wenawu u famba na mina.’ Debora i famba zinwe naye, kanilezi yena aku ngalo ka Barake: ‘U nga tava ni wudzunzo hi kuhlula loko, hakuva Jehova i ta nyikela Sisera canjeni ga wasati.’ Ni lezo hi zona zi mahekako.

Barake i relela hi le Xitsungeni xa Tabora kasi ku ya tlhangana ni masochwa ya Sisera. Hi xitshuketi Jehova i vanga ntalo, ni masochwa yo tala ya valala ma mbemba. Kanilezi Sisera i jatama hi kareteni yakwe a tsutsuma.

Anzhako ka xikhati xo kari Sisera iya tendeni ga Jaeli. Yena i mu ramba ku enghena, a mu nyika masi. Lezo zi mu vangela wurongo, niku nzeni ka xikhatanyana yena i etlela wurongo ga hombe nguvu. Makunu Jaeli i teka a xikhongwani xa tenda a xi belela ka hloko ya wanuna loyi wo biha. Anzhako ka lezo, laha Barake a nga chikela, yena i mu komba a mufi Sisera! Wa zi wona makunu lezaku lezi Debora a wulileko zi mahile lisine.

Hi kugumesa ku dawawu Hosi Jabina, ni vaIsraeli va tlhela va kuma kurula hi xikhati xo kari.