MADOROPA yo tala ya Kanani ma ti longisela kulwa na Israeli makunu. Va pimisa lezaku va ta hlula. Kanilezi a vanhu va lomu doropeni ga Gibeoni gi nga laha kusuhani a va pimisi lezo. Vona va kholwa lezaku Nungungulu wa vuna vaIsraeli, niku a va zi lavi kulwa na Nungungulu. Makunu wa zi tiva lezi va mahako vaGibeoni?

Vona va boha ku maha a ku khwatsi va hanya wutshanwini ga kule nguvu. Hizalezo vavanuna vo kari va boha tinguwo to hlakala ni zilato za kale. Va rwexa timbongola tabye a tisakwa ta kale, va tlhela va teka zibaba za kale zi womileko. Zonake vaya ka Joxua va yaku: ‘Hita hi tikweni ga kule nguvu, hakuva hi zwile hi Nungungulu wa nwina wa hombe, Jehova. Hi zwile zilo zontlhe lezi yena a mu maheleko le Gipite. Hikwalaho a varangeli va hina va hi leletele ku longa timbuva lezaku hita hi taku ngalo ka nwina: “Hi malanza ya nwina. Tsumbisani lezaku mu nga talwa na hina.” Ma zi kota ku wona lezaku a tinguwo ta hina ti hlakele hi kota ya pfhumba go leha, a zibaba za hina kambe za kale niku zi womile.’

Joxua ni tihosana tinwani va kholwa vaGibeoni. Hizalezo va maha xitsumbiso xa ku ngalwi na vona. Kanilezi masiku manharu anzhako ka lezo va tiva lezaku a vaGibeoni hi lisine va hanya lomu kusuhani.

Joxua a va wutisa aku: ‘Hikuyini mu nga hi byela lezaku mu tile hi tikweni ga le kule ke?’

A vaGibeoni va hlamula vaku: ‘Hi mahile lezo hakuva hi byelilwe lezaku Nungungulu wa nwina Jehova i tsumbisile ku mu nyika gontlhe tiko legi ga Kanani. Hizalezo hi wa chava lezaku mu wa ta hi daya.’ Kanilezi a vaIsraeli va hlayisa xitsumbiso xabye, a va dayi vaGibeoni. Hambulezo va va maha malanza yabye.

A hosi ya le Jerusalema yi zangara nguvu hi lezi a vaGibeoni va mahileko kurula na Israeli. Makunu yona yi byela tinwani tihosi ta mune yiku: ‘Ngonani mu ta nzi vuna a kulwa na Gibeoni.’ Lezo hi zona ti mahako tihosi leto ta ntlhanu. Xana vaGibeoni va mahile za wutlhari hi ku maha kurula na Israeli, ku nga lexi makunu xi tisako tihosi leti a ku talwa navo ke? Hi ta zi wona.