LOMU ka Biblia u ta kuma a bhuku gi vitwako Rute. Gona gi wulawula hi matimu ya ngango wu hanyileko xikhatini lexi Israeli a nga hi ni valamuli. Rute i nhwana wa tiko ga Moabi; yena a nga lumbi tiko ga Nungungulu ga ka Israeli. Kanilezi laha Rute a gonzako hi Nungungulu wa lisine Jehova, yena iza a mu ranza nguvu. Naomi wasati wo kumba loyi a vunileko Rute a ku gonza hi Jehova.

Naomi wasati wa muIsraeli. Yena ni nuna wakwe zinwe ni vana vambiri va vafana va rurile vaya tikweni ga Moabi a xikhatini lexi ku nga hi ni zakuga zitsongwani le Israeli. Zonake a nuna wa Naomi i lofa ka siku go kari. Anzhako ka lezo a vana va Naomi va lo tekana ni vanhwana vambiri va vaMoabi va vitwako Rute na Orpa. Kanilezi loku ku hunzile xipimo xa 10 wa malembe, a vana va Naomi va vambiri va lofa. A hi kubayiseka loku Naomi ni vanhwana lavo va vambiri va ngave nako! Zini lezi Naomi a nga wa ta maha makunu?

Ka siku go kari Naomi i boha ku teka pfhumba ga hombe ga ku tlhela kaya le ka va ka kabye. Rute na Orpa va lava ku tshama naye, hikwalaho vonawu va famba zinwe naye. Kanilezi loku va fambile pfhuka wo kari wa ndlela, Naomi i hunzuluka aku ngalo ka vanhwana: ‘Tlhelani kaya mu ya tshama ni vamamani va nwina.’

Naomi i pswopswa vanhwana a va salisa. Hi kota ya lezo vona va sangula ku rila, hakuva va mu ranza nguvu Naomi. Vona vaku: ‘Ahihi! Hi ta famba na wena ka vanhu va wena.’ Kanilezi Naomi i hlamula aku: ‘Mu fanele ku tlhela, vana vanga. Zi tava chukwana ka nwina le kaya.’ Hikwalaho Orpa i teka ndlela yakwe ya kuya kaya. Kanilezi Rute a nga fambi.

Naomi i hunzuluka aku kakwe: ‘Orpa i fambile. Fambawu kaya zinwe naye.’ Kanilezi Rute i hlamula aku: ‘U nga nzi khongoteli ku ku tsika! Nzi tsike nzi famba na wena. Laha u yako kona minawu nzi taya kona, ni kwihi laha u tshamako kona minawu nzi ta tshama laho. A vanhu va wena va tava vanhu va mina, ni Nungungulu wa wena i tava Nungungulu wa mina. Laha u ta nga fela kona minawu nzi ta fela laho, niku hi kona nzi to lahliwa kona.’ Laha Rute a wulako lezo, Naomi a nga ha zami kambe a ku mu maha aya kaya.

Hi kugumesa a vavasati lavo va vambiri va chikela le Israeli. Kwaseyo vona va ti longisela ku hanya kona. Zalezo Rute i sangula ku tira lomu masinwini, hakuva xikhati xa ku hula a sevada. A wanuna wo kari a vitwako Boazi i mu vumela a ku hula sevada lomu masinwini yakwe. Wa zi tiva a ku ku wa hi mani a mamani wa Boazi? Ku wa hi Rahabi wa le doropeni ga Jeriko.

Ginwani siku Boazi i byela Rute ku ngalo: ‘Nzi bikelwe zilo zontlhe ha wena, ni wunene legi u nga gi kombisa ka Naomi. Nza zi tiva ni lezi u tsikisileko zona a raru wa wena ni mamani wa wena hambu ni tiko ga wena ni lezi u nga tisa zona a ku ta hanya xikari ka vanhu lava u nga va tivangiko hi mahlweni. Ngha Jehova ava mu nene ka wena!’

Rute a hlamula: ‘Wa nzi mahela zo saseka, dada. U nzi tangalisile hi ndlela leyi u wulawulisileko ha yona na mina.’ Boazi i ranza nguvu Rute, zonake vona vaza va tekana na ku nga se hunza xikhati xo leha. A hi kona kutsaka loku Naomi a nga nako! Kanilezi Naomi i tlhela a tsaka nguvu loku Rute na Boazi va kuma n’wana wabye wo sangula wa mufana, a vitwako Obedi. Anzhako Obedi i maha kokwani wa Davida, loyi hi to gonza nguvu ha yena xikhatini xi tako.