WA GI tiva a vito ga wanuna loyi a nga hi ni ntamu wo hlamalisa wa ku cima a ku se va kona wo fanana naye? Yena mulamuli a vitwako Samsoni. Hi Jehova a nyikako ntamu Samsoni. Hambu na a nga se ku pswaliwa Samsoni, Jehova i byela mamani wakwe ku ngalo: ‘Lokuloku u tava ni n’wana wa mufana. Yena i ta rangela a kutlhatlhiswa ka Israeli hi ka vaFilistia.’

A vaFilistia vanhu vo biha va hanyako Kanani. Va na ni masochwa yo tala, niku wona hakunene ma xanisa vaIsraeli. Ginwani siku, loku Samsoni a hi ndleleni ya kuya le va tshamako kona vaFilistia, yena i khingiwa hi nghala ya hombe na yi dzuma. Kanilezi Samsoni i daya a nghala leyo hi mandla yakwe basi. Yena i tlhela a daya mazana ya vaFilistia vo biha.

Anzhako ka xikhati Samsoni i ranzana ni wasati a vitwako Delila. A varangeli va vaFilistia va tsumbisa ku ngalo a munwe ni munwani wabye i ta nyika Delila a 1.100 wa zingerengere za siliva loku yena a va byela lezi zi mahako Samsoni ava ni ntamu wo hlamalisa. Delila wa yi lava a mali leyo yontlhe. Yena a hi munghana wa lisine wa Samsoni, kutani wa vanhu va Nungungulu. Hikwalaho yena i tshama hi ku wutisela Samsoni a ku zini lezi zi mu mahako ava ni ntamu wo hlamalisa.

Hi kugumesa, Delila wa zi kota ku maha lezaku Samsoni a mu tlhamusela a fihlakalo wa ntamu wakwe. Samsoni i ngalo: ‘A misisi ya mina cima a yi se tsemetiwa. Kusukela xikhatini xa ku pswaliwa ka mina, Nungungulu i nzi hlawulile akuva nanza gakwe go hlawuleka gi vitwako muNazirita. Loku a misisi ya mina yi wa tsemetiwa, nzi wa ta luza a ntamu wa mina.’

Kasike, laha Delila a tivako lezo, yena i maha lezaku Samsoni a etlela madzolweni yakwe. Zonake a vitana wanuna a enghena lomu ndlwini lezaku a mu tsemeta misisi yakwe. Laha Samsoni a vukako, a nga ha hi na ntamu wakwe. Makunu a vaFilistia va enghena va mu khoma. Va mu xokolela matihlo yakwe ya mambiri, va tlhela va mu maha khumbi yabye.

Ka siku go kari a vaFilistia va na ni mubuzo wa hombe wa ku khozela nungungulu wabye Dagoni, makunu va humesa Samsoni hi le paxweni lezaku a ta va hlekisela. Ka xalexo xikhati, a misisi ya Samsoni yi wa sina yi kulile. Samsoni i byela mufana loyi a mu fambisako hi woko aku ngalo: ‘Nzi lava ku khoma a timhanze ti tiyisako a yindlu.’ Zonake Samsoni i khongelela ku nyikwa ntamu hi Jehova, a tlhela a khoma a timhanze. Yena a kanyuluka aku: ‘A nzife ni vaFilistia.’ Kwalaho ku na ni 3.000 wa vaFilistia laha mubuzweni, kasike laha Samsoni a koramako a nikinya timhanze a yindlu yiwa yi daya vontlhe vanhu lavo vo biha.