WA YI tiva a ku i yindlu ya yini leyi? I tenda go hlawuleka kasi ku khozela kona Jehova. Gona kambe gi vitwa a ku i tabernakeli. A vanhu va mbhetile a ku gi aka anzhako ka lembe ginwe kusukela loku va sukile Gipite. Wa zi tiva a ku gi akilwe hi maalakanyo ya mani?

Ku wa hi maalakanyo ya Jehova. Laha Mosi a nga hi le hehla ka Xitsunga xa Sinai, Jehova i mu leletele lezi a nga wa ta gi akisa zona. Yena i mu byelile a ku gi aka hi ndlela ya ku zi koteka a ku gi tlhatlhelela hi kuhehuka. Hi ku maha lezo a zipanze za gona zi wa ta rwaliwa ziya ka ginwani wutshamu, zi tlhela zi ya patsiwa kwaseyo. Hikwalaho a xikhati lexi a vaIsraeli va nga rura hi wutshamu ginwe vaya ka ginwani le xiwuleni, va wa gi rwala va fambafamba nago.

Loku u cuwuka lomu nzeni ka kwarutu ya yitsongwani ya tenda, wa zi kota ku wona a bhokisa, kutani nghaxa. Yona yi vitwa a ku i nghaxa ya xivumelwano. Yi wa hi ni tingelosi timbiri kutani makerubima yo mahiwa hi nzalama, yinwe hi magumo ya tlhelo ginwe ni yinwani hi ka manwani magumo. Nungungulu i tlhelile a tsala a Milayo ya Khume laha ka timbila timbiri ta maribye, hakuva Mosi i wa fayile leti to sangula. A maribye lawo ma wa vekiwa lomu nzeni ka nghaxa ya xivumelwano. Ku wa vekiwa a mbita ya manna lomu nzeni ka yona kambe. Wa alakanya a ku zini manna?

Aroni a makabye wa Mosi hi yena a hlawulwako hi Jehova kasi kuva mupristi wa hombe. Yena i rangela vanhu kukhozeleni ka Jehova. A vana vakwe vapristi na vonawu.

Lezi cuwuka a kwarutu ya hombe ya tenda. Yona yi hunza hi kumbiri leyi ya yitsongwani. Wa gi wona a bhokisa, kutani nghaxa ya yitsongwani, leyi yi tuvikako musi? Leyi i alati laha a vapristi va hisako kona a zilo zo nuhela zi vitwako a ku libani. Makunu ku na ni meza ya tikandiya yi nga ni tikandiya ta ntlhanu ni timbiri. A xa wunharu lomu kwarutwini i meza. Lahehla ka yona ku vekiwa a 12 wa zibaba.

Laha tsenzeleni ga tabernakeli ku na ni mukhelo wa hombe, kutani xinamelo, lexi xi teleko hi mati. A vapristi va hlamba ka xona. Laho kambe ku na ni alati ya hombe laha ku hisiwako kona zihari zofa kota munyikelo ka Jehova. A tenda gi kumeka laha xikari ka wugovelo, ni vaIsraeli va hanya matendeni yabye lawa ma gi ranzeleko.