XIPIMO xa tihweti timbiri na va sukile Gipite, a vaIsraeli va chikela Xitsungeni xa Sinai, lexi xi vitwako kambe a ku i Horebe. Legi hi gona a wutshamu ga ginwe laha Jehova a nga wulawulile na Mosi hi lomu xihlahleni xi nga kari xi vura nzilo. A vanhu va gova laho va tshama xikhatanyana.

Mosi i kanziha xitsungeni na vanhu va rinzela lahasi. Kwale hehla ka xitsunga, Jehova i byela Mosi a ku Yena i lava lezaku a vaIsraeli va Mu ingisa niku va maha vanhu Vakwe vo hlawuleka. Loku Mosi a relela, yena i byela vaIsraeli lezi Jehova a wulileko. Ni vanhu vaku ngalo va ta ingisa Jehova, hakuva va zi lava ku maha vanhu vakwe.

Jehova makunu i maha nchumu wo hlamalisa. Yena i maha lezaku le hehla ka xitsunga ku tuvika musi, a tlhela a vanga kudzinza ka hombe. Yena i tlhela a wulawula ni vanhu: ‘Hi mina Jehova Nungungulu wa nwina loyi a mu humesileko Gipite.’ Makunu yena i laya ku ngalo: ‘Mu nga khozeli vanwani vanungungulu ahandle ka mina.’

Jehova i nyika vaIsraeli zinwani zilayelo za ntlhanu ni mune, kutani milayo. A vanhu va khonwa hi kuchava ka hombe. Va byela Mosi ku ngalo: ‘Wulawula na hina wena, hakuva hi chava lezaku loku Nungungulu a wulawula na hina hi ngafa.’

Anzhako Jehova i byela Mosi ku ngalo: ‘Kanziha u ta ka mina leno xitsungeni. Nzi ta ku nyika a timbila timbiri ta maribye laha nzi tsalileko kona milayo leyi nzi lavako lezaku a vanhu va yi hlayisa.’ Hizalezo Mosi i tlhela a kanziha le hehla ka xitsunga. Yena i tshama seyo a 40 wa masiku ni 40 wa wusiku.

Nungungulu i na ni milayo yo tala nguvu kasi ku nyika a vanhu vakwe. Mosi i tsala milayo leyo. Nungungulu i tlhela a nyika Mosi a timbila ta timbiri ta maribye. Ka tona, Nungungulu i wa tsalile a milayo ya 10 leyi a nga byela a vanhu vakwe vontlhe. Yona yi vitwa a ku Milayo ya Khume.

A Milayo ya Khume milayo ya lisima. Kanilezi a milayo yinwani leyi Nungungulu a nyikako vaIsraeli yonawu ya lisima. A wunwe wa milayo leyo hi lowu: ‘U ta ranza Jehova Nungungulu wa wena hi mbilu ya wena yontlhe, hi kupima ka wena kontlhe, hi muhefemulo wa wena wontlhe ni ntamu wa wena wontlhe.’ Ni wunwani hi lowu: ‘U ta ranza wakeleni wa wena kota lezi u ti ranzako wutsumbu.’ N’wana wa Nungungulu, Jesu Kristu, i te ngalo a milayo leyi ya yimbiri hi yona yi nga ya hombe a ku hunza yontlhe milayo leyi Jehova a nga nyika a vanhu vakwe, va ka Israeli. Hi kufamba ka xikhati hi ta gonza zilo zo tala hi N’wana wa Nungungulu ni tigonzo takwe.