WA MU tiva a wasati loyi wo saseka a khingako Davida? A vito gakwe hi Abigaili. Yena i na ni kupima ka ku nene, niku i valela Davida a ku maha nchumu wo biha. Kanilezi na hi nga se tiva lezo, a hi woneni lezi zi tako na zi mahekela Davida.

Anzhako ka loku Davida a tsutsumile Saule, yena i fihlala lomu ka rinzi. A vamakabye vakwe ni vanwani va ngango wakwe va lo ta patsana naye kwalomo. Yena i telwa hi xipimo xa 400 wa vavanuna, zonake Davida i maha murangeli wabye. Kasike Davida iya ka hosi ya Moabi a yaku ngalo: ‘Maha wuxinji u vumela a raru wa mina ni mamani wa mina a ku tshama na wena kala nzi wona lezi zi ta nga nzi humelela.’ Anzhako Davida ni vavanuna vakwe va sangula ku fihlala lomu zitsungeni.

Kuve anzhako ka lezo laha Davida a nga tlhangana na Abigaili. A nuna wakwe Nabali munhu a ganyileko na hi nwinyi wa petso wo kari. Yena i na ni 3.000 wa tiyivu ni 1.000 wa timbuti. Nabali i wanuna wo biha. Kanilezi a sati wakwe Abigaili i sasekile nguvu. Yena kambe i tiva ku maha lezi zi nga zi nene. Ka xikhati xo kari yena iza a ponisa a ngango wakwe. A hi woneni a ku zi mahisile kuyini.

Davida ni vavanuna vakwe va mahile zi nene ka Nabali. Vona va vunile ku vikela a tiyivu takwe. Makunu ka siku go kari Davida i rumela vo kari xikari ka vavanuna vakwe a ku ya maha xikombelo ka Nabali. A vavanuna va Davida va chikela ka Nabali na yena ni vavuneteli vakwe va kari va kaya a woya ga tiyivu. I siku ga mubuzo, niku Nabali i na ni zilo zo tala za zi nene zi felako ku giwa. Zonake a vavanuna va Davida va wula lezi: ‘Hi ku mahele zi nene. A hi yivangi ni yinwe ya tiyivu ta wena, kanilezi hi vunetele a ku ti wonelela. Makunu, maha wuxinji, u hi nyika zakuga.’

Nabali aku ngalo: ‘Nzi nga ta nyikela zakuga za mina ka vavanuna vo kota nwina.’ Yena i wulawula hi ndlela yo biha nguvu, a tlhela a wulawulela zilo zo biha ha Davida. Loku a vavanuna va tlhela va ya hlawutela Davida hi lezo, Davida i zangara nguvu. Davida a byela vavanuna vakwe ku ngalo: ‘Hlomani tisupado ta nwina!’ Zalezo vona va teka a ndlela yabye ya ku ya daya Nabali ni vavanuna vakwe.

Munwe wa vavanuna va Nabali, a nga zwile magezu yo biha lawa ma nga wuliwa hi Nabali, i hlawutela Abigaili lezi zi humeleleko. Zalezo Abigaili i longisela zakuga. A zi pakela ka timbongola a nghena ndleleni. Laha a tlhanganako na Davida, yena i chika hi laha ka mbongola yakwe, a khizama aku: ‘Maha wuxinji, dada, u nga khataleli nuna wa mina Nabali. Xipumbu, ni lezi a zi mahako za wupumbu. Hi lexi xinyikiwo. Maha wuxinji u xi amukela, u tlhela u hi tsetselela hi lezi zi mahekileko.’

Davida a hlamula aku: ‘U wasati wo tlhariha. U nzi valele ku daya Nabali na nzi fela ku mu tlhelisela hi kubiha kakwe. Makunu famba kaya hi kurula.’ Loku ku hunzile xikhati, laha Nabali a ngafa, Abigaili i maha munwe wa vasati va Davida.