SAULE i engeta a zama ku khoma Davida. Yena i teka a 3.000 wa masochwa yakwe yo hlawuleka a famba a mu langutela. Laha Davida a tivako lezo, i rumela tihloli a ku ya tiva laha Saule ni vavanuna vakwe va govileko kona wusiku lego. Zonake Davida i wutisa vambiri va vavanuna vakwe ku ngalo: ‘Himani wa nwina a to famba na mina le wugovelweni ga Saule ke?’

Abixai a hlamula aku: ‘Mina nzi ta famba.’ Abixai i n’wana wa Zerua a makabye wa xisati wa Davida. Laha Saule ni vavanuna vakwe va nga kari va etlela, Davida na Abixai va enghena hi kunyanimela lomu wugovelweni. Va teka a tlhari ga Saule ni nghotso yakwe ya mati, leyi yi nga hi lahasi kwalaha tlhelweni ga hloko ya Saule. A ku na munhu a zi wonako kutani ku zizwa hakuva vona vontlhe va khomilwe hi wurongo ga hombe nguvu.

Wona Davida na Abixai makunu. Va humile, niku va lomu kutshamisekeni le hehla ka xitsunga. Davida i kanyulukela nduna ya butho ga ka Israeli gi nga le hasi aku: ‘Abneri, hikuyini u nga vikeliko a nwinyi wa wena, a hosi ke? Hi nga wona! Gi kwihi tlhari gakwe ni nghotso yakwe ya mati ke?’

Saule a vuka. Yena i tiva gezu ga Davida, a wutisa aku: ‘Hi wena loye, Davida ke?’ Wa mu wona Saule zinwe na Abneri le hasi?

Davida a hlamula Saule aku: ‘Ina, hosi yanga.’ Zalezo Davida a wutisa aku: ‘Hikuyini u zamako ku nzi khoma? Xilo muni xo biha nzi mahileko ke? Hi legi tlhari ga wena, O hosi. Ruma munwe wa vavanuna va wena a ta gi teka.’

Saule a vumela aku: ‘Nzi mahile kubiha. Nzi mahile wupumbu.’ Zalezo Davida i teka ndlela yakwe, Saule na yenawu i tlhela kaya. Kanilezi Davida i alakanyela lomu mbilwini aku ngalo: ‘Ka ginwe ga masiku lawa Saule i ta nzi daya. Nzi ta tsutsumela tikweni ga vaFilistia.’ Lezo hi zona a mahako. Davida i zi kota ku khohlisa vaFilistia a va maha va kholwa lezaku yena makunu i le tlhelweni gabye.

Loku ku hunzile xikhati xo kari a vaFilistia vaya va yalwa na Israeli. Kwale kulweni, ku dawa Saule na Jonatani. Lezo zi bayisa nguvu Davida, zonake i tsala lisimu lo saseka, laha a yimbelelako ku ngalo: ‘Nza ku bayisekela, nakuloni Jonatani. U wa nzi xalalisa nguvu!’

Anzhako ka lezo Davida i tlhelela Israeli aya doropeni ga Hebroni. Ku na ni yimpi xikari ka vavanuna va khuzelako Ixboxete a n’wana Saule a kuva a maha hosi ni vavanuna lava va lavako Davida lezaku a mahawu hosi. Kanilezi hi magumo ya kona a vavanuna va Davida va hlula. Davida i na ni tanga ya 30 wa malembe xikhatini lexi a mahiwako hosi. Yena i fuma le Hebroni a xipanze xa ntlhanu wa malembe ni mambiri ni khihlanya. A vo kari va vana lava va pswalelweko yena kwaleyo a mavito yabye hi Amnoni, Absalome na Adonija.

Ku chikela xikhati lexi Davida ni vavanuna vakwe va yako va ya khozisa a doropa go saseka gi vitwako Jerusalema. Joabe, munwani n’wana wa Zerua a makabye wa xisati wa Davida, i rangela a kulwa loko. Hizalezo Davida i chachazela Joabe hi ku mu maha nduna ya butho gakwe. Makunu Davida i sangula ku fuma le doropeni ga Jerusalema.