ANZHAKO ka kufa ka Hosi Jeroboamu, a hosi yinwe ni yinwani yi fumako mufumo wa le nwalungu wa tixaka ta 10 ta ka Israeli yi bihile. Hosi Ahabi hi yena wo biha ku hunza tontlhe. Wa zi tiva a ku hikuyini? A xigelo xa hombe hi sati wakwe, Muzinza wo biha Jezebeli.

Jezebeli a hi wasati wa muIsraeli. Yena i n’wana wa hosi ya le Sidoni. Yena i khozela a nungungulu wa mawunwa Baali, niku yena i hambukisa Ahabi ni vaIsraeli vo tala lezaku vonawu va khozela Baali. Jezebeli i venga Jehova a tlhela a daya vaprofeti vakwe vo tala. Vanwani va za va fihlala lomu marinzini kasi ku va nga dawi. Loku Jezebeli a lava nchumu wo kari, yena i ta za a daya munhu futsi lezaku a wu kuma.

Ka siku go kari Hosi Ahabi i bayiseka nguvu. Hizalezo Jezebeli i mu wutisa aku: ‘Hikuyini u bayisekako nyamutlha ke?’

Ahabi a hlamula aku: ‘Hi mhaka ya lezi Nabote a nzi byelileko. Nzi wa lava ku xava a xivina xakwe. Kanilezi yena i nzi byelile ku ngalo nzi wa nga ta xi kuma.’

Jezebeli aku ngalo: ‘U nga xaniseki. Nzi ta xi kuma nzi ku nyika.’

Hikwalaho Jezebeli i tsalela mapapilo a tinduna to kari ta doropa lego Nabote a hanyako ka gona. A va byela ku ngalo: ‘Lavani vavanuna vo kari va nyamijiri kasi va ta wula ku ngalo Nabote i rukile Nungungulu ni hosi. Zonake mu humesa Nabote le handle ka doropa mu mu gandla hi maribye kala afa.’

Zalezo Jezebeli a tivako lezaku Nabote i file, i ngalo ka Ahabi: ‘Famba makunu u ya teka a xivina xakwe.’ A wu vumeli lezaku Jezebeli i fanele ku tsayisiwa hi ku maha a nchumu wo tshisa wo kota lowo?

Hikwalaho, hi kufamba ka xikhati, Jehova i rumela wanuna Jehu a ku ya mu tsayisa. Laha Jezebeli a zwako lezaku Jehu wata, yena i ti penda mahlo yakwe a tlhela a zama ku ti sasekisela. Kanilezi laha Jehu a tako a wona Jezebeli hi laha njhaneleni, i vitana vavanuna lomu ndlwini ya wuhosi aku: ‘Mu hoxeni lahasi!’ A vavanuna lavo va vumela, kota lezi u zi wonako laha ka mufananiso. Va mu hoxa lahasi, zonake yena afa. Lawa hi wona magumo ya Muzinza wo biha Jezebeli.