SOLOMONI i lomu tangeni yo rama a xikhati lexi a mahako hosi. Yena i ranza Jehova, niku i lanzela a wusungukati gi nene legi a nyikilweko hi raru wakwe Davida. Jehova i xalala ha Solomoni, zonake ni wusiku go kari yena i wula lezi hi lomu ka noro: ‘Solomoni, zini lezi u zi ranzako a kuva nzi ku nyika ke?’

Hizalezo Solomoni i hlamula aku: ‘Jehova Nungungulu wa mina, nzi nwanana nguvu niku a nzi tivi ku rangela. Kasike nzi nyike wutlhari ga ku rangela vanhu va wena hi ndlela yi nene.’

Jehova i xalala hi lezi Solomoni a kombelako. Aku ngalo makunu: ‘Kota lezi u nga kombela wutlhari ahandle ka ku kombela wutomi go leha kutani titshomba, nzi ta ku nyika wutlhari go engeteleka ga ku cima a ku seva ni munhu a ngave na gona. Kanilezi nzi ta ku nyikawu ni lezi u nga zi kombelangiko, a titshomba ni wudumo.’

Loku ku hunzile xikhatanyana kuta vavasati vambiri ka Solomoni na va hi ni mhaka yo karata. Munwe wa vona i tlhamusela ku ngalo: ‘A wasati loyi i hanya zinwe na mina ka yindlu yinwe. Mina nzi lo hefemula a nwanana wa mufana, zonake loku ku hunzile masiku mambiri yenawu i lo hefemula a nwanana wa mufana. Ka wusiku go kari anzhako ka lezo a nwanana wakwe i lofa. Kanilezi laha nzi nga kari nzi etlele, yena i lo veka a nwanana wakwe kusuhani na mina a tlhela a teka loyi wa mina. Laha nzi nga vuka nzi cuwukisisa a nwanana loyi a fileko, nzi wonile lezaku i wa nga hi wa mina.’

Zalezo loyi munwani wasati aku ngalo: ‘Ahihi! A nwanana a hanyako wa mina, ni loyi a fileko wa yena!’ A wasati wo ranga a hlamula aku: ‘Ahihi! A nwanana a fileko wa wena, kasike loyi a hanyako wa mina!’ A vavasati lavo va kanetisana hi wolawo mamahela. Zini a to maha Solomoni ke?

Yena i vitanisa a supado, niku, laha yi nehiwako, i ngalo: ‘Panzani nwanana loyi a hanyako hi laha xikari, mu nyika khihlanya ka munwe wasati ni legi ginwani khihlanya mu nyika loyi munwani.’

A mamani wa lisine aba huwa aku: ‘Ahihi! Mahani wuxinji, mu nga dayi a nwanana. Mu nyikeleni ka yena!’ Kanilezi loyi munwani wasati aku ngalo: ‘Mu nga nyiki ni munwe wa hina; simamani mu mu panza hi laha xikari.’

Hi kugumesa Solomoni aku ngalo: ‘Mu nga dayi nwanana! Mu nyikeleni ka wasati wo ranga. Hi yena a mamani wa lisine.’ Solomoni i tiva lezo hakuva a mamani wa lisine i ranza nguvu a nwanana laha ko kala a zi wona zi hi chukwana ku mu nyikela ka munwani wasati na a fela ku a nga dawi. Laha a vanhu va zwako hi lezi Solomoni a nga xuxisa zona a mhaka leyo, va tsaka hi kuva ni hosi ya wutlhari yo kota leyo.

Xikhatini xa kufuma ka Solomoni, Nungungulu i katekisa vanhu hi ku maha lezaku a misava yi pfuna zakuga zo tala zo kota tirigu ni sevada, mauva ni makuwu zinwe ni tinwani tixaka ta zakuga. A vanhu va ambala tinguwo ta wuchukwana va tlhela va hanya lomu ka tiyindlu ta ti nene. A vanhu vontlhe va enelelwa hi zontlhe lezi zi nga zi nene zi tlhela zi sala.