WA ZI tiva lezi a xinhanyatana lexi xi wulako ke? Xona xi byela a wasati hi muprofeti wa Jehova, Elixa, ni zilo zo hlamalisa lezi Jehova a mu vunako ku maha. A wasati a nga mu tivi Jehova hakuva yena a hi muIsraeli. A hi woneni, makunu, a ku hikuyini a nhanyana a nga laha mutini wa wasati.

A wasati muSiria. A nuna wakwe hi Namani, a nduna ya butho ga Siria. A vaSiria va wa khomile a xinhanyatana lexi xa muIsraeli, zonake xona xi lo tisiwa ka sati wa Namani lezaku xi maha xitiri xakwe.

Namani i na ni wubabyi go tshisa gi vitwako hlokonho. A wubabyi lego ga zi kota futsi a ku maha lezaku a nyama ya munhu yi hlunukela. Makunu a nhanyana loyi i byela lezi a sati wa Namani: ‘Nzi xuva ku a nwinyi wa mina a famba ka muprofeti wa Jehova le Israeli. Yena i wa ta mu hanyisa ka hlokonho yakwe.’ Anzhako lezo zi hlawuteliwa ka nuna wa wasati.

Namani wa zi lava nguvu a ku hanyisiwa; hikwalaho yena i boha ku famba Israeli. Laha a chikelako seyo, iya mutini wa Elixa. Elixa i rumela a nanza gakwe a ku ya byela Namani lezaku a famba a ya hlamba le Congweni wa Jordani a ntlhanu wa zikhati ni zimbiri. Lezo zi zangarisa nguvu Namani, zonake aku ngalo: ‘A micongo ya le tikweni ga mina yi chukwana ka yontlhe micongo ya lomu Israeli!’ Anzhako ka kuva a wulile lezo, Namani i suka a famba.

Kanilezi a munwe wa malanza yakwe i mu byela lezi: ‘Dada, loku Elixa i wa ku byelile ku maha nchumu wo binza, u wa ta wu maha. Makunu hikuyini u nga zi kotiko ku ti hlaza basi, kota lezi a wulileko ke?’ Namani i ingisa nanza gakwe zonake a famba a ya ti peta lomu Congweni wa Jordani a ntlhanu wa zikhati ni zimbiri. Laha a ti petako, a nyama yakwe yi tlhela yi tiya ni ku hanya khwatsi!

Namani i tsakile nguvu. Yena i tlhela ka Elixa a ya mu byela ku ngalo: ‘Makunu nza zi tiva hakunene lezaku a Nungungulu wa Israeli hi yena ntsena Nungungulu wa lisine misaveni yontlhe. Kasike, maha wuxinji, amukela xinyikiwo xa mina.’ Kanilezi Elixa a hlamula aku: ‘Ahihi, nzi nga ta xi amukela.’ Elixa wa zi tiva ku ngalo zi wa tava zi bihile a ku yena a teka a xinyikiwo lexo, hakuva Jehova hi yena loyi a nga hanyisile Namani. Kanilezi Gehazi a nanza ga Elixa wa xi lava xinyikiwo lexo lezaku xiva xa yena.

Makunu lezo hi zona a mahako Gehazi. Anzhako ka kuva Namani a sukile, Gehazi i tsutsuma a mu lanza kala a mu kuma. Gehazi a yaku ngalo: ‘Elixa i nzi rumile a ku ta ku byela ku ngalo wa lava zinyikiwo zo kari kasi ku nyika vanghana va ha hi ku tako a ku ta mu vuxela.’ Lezo, hakunene, mawunwa. Kanilezi Namani a nga zi tivi lezaku lezo mawunwa; hikwalaho yena i nyika Gehazi a zinyikiwo zo kari.

Loku Gehazi a tlhela kaya, Elixa wa zi tiva lezi a mahileko. Jehova i mu byelile. Zonake yena aku ngalo: ‘Kota lezi u mahileko a nchumu lowu wo biha, a hlokonho ya Namani yi tata hehla ka wena.’ Zalezo, yona yi mu pomela!

Hi nga gonza yini hi ka zontlhe lezo ke? Xo sangula, lezaku hi fanele ku fana ni xinhanyatana lexiya zonake hi wulawula hi Jehova. Lezo zi ngava zi nene nguvu. A xa wumbiri, a hi fanelangi kuva va kutikulisa kota lezi Namani a nga hi zona kusanguleni, kanilezi hi fanele ku ingisa malanza ya Nungungulu. Ni xa wunharu, a hi fanelangi ku hemba kota lezi Gehazi a mahileko. Xana a hi nge gonzi zo tala hi ku gonza a Biblia ke?