LOKU u wafa, i wa ta ti zwisa kuyini mamani wa wena loku u wa tlhela u hanya? Yena i wa ta tsaka nguvu! Kanilezi a munhu loyi a fileko wa zi kota ku tlhela a hanya ke? Za tshuka zi maheka lezo?

Cuwuka a wanuna loyi laha, zinwe ni wasati ni mufana tsongwani. A wanuna loye hi muprofeti Elija. A wasati i noni ya le doropeni ga Zarefate, zonake a mufana i n’wana wakwe. Makunu, ka siku go kari a mufana i khonwa hi wubabyi. Yena i sika nguvu laha ko kala afa hi magumo ya kona. Elija makunu i byela wasati ku ngalo: ‘Neha a mufana ka mina.’

Elija i teka a nwanana a fileko a kanziha aya le hehla a ya mu etlelisa laha mubhedini. Zonake a khongela aku: ‘O Jehova, maha lezaku a mufana a tlhela a hanya.’ A mufana a sangula ku hefemula! Hizalezo Elija i chika naye lahasi a yaku ngalo ka wasati: ‘Cuwuka, a n’wana wa wena wa hanya!’ Hizalezo zi mahako lezaku a mamani wakwe a tsaka nguvu.

Munwani muprofeti wa hombe wa Jehova i vitwa ku ngalo hi Elixa. Yena i tira kota muvuneteli wa Elija. Kanilezi hi kufamba ka xikhati Jehova i tirisawu Elixa lezaku a maha zihlamaliso. Ginwani siku Elixa iya doropeni ga Xuname, laha a wasati wo kari a nga mu nene nguvu ka yena. Anzhako a wasati loyi i pswala n’wana wa mufana.

Ni mixo wo kari, anzhako ka ku mufana loye a kulilenyene, yena i huma a lanza raru wakwe a tirako masinwini. Hi xitshuketi a mufana iba huwa aku: ‘A hloko ya mina ya bayisa!’ Anzhako ka kuva a yisilwe kaya, a mufana afa. A hi kubayiseka loku a mamani wakwe a nga na kona! Zalezo yena i famba a ya teka Elixa.

Laha Elixa a chikelako, i enghena lomu ndlwini ni nwanana a fileko. Yena i khongela ka Jehova, a tlhela a ti nawuluta hehla ka miri wa nwanana. Hi xikhatanyana a miri wa mufana wu kufumela, zonake a wetshemula a ntlhanu wa makhati ni mambiri. A hi kutsaka loku a nga nako mamani wakwe laha a nghenako a kuma a mufana wakwe na a hanya!

Ku file vanhu vo tala nguvu. Lezo zi mahile lezaku a mingango yabye ni vanghana vabye va bayiseka nguvu. Hina a hi na ntamu wa ku vuxa vafileko. Kanilezi Jehova i nawo. Anzhako hi ta gonza hi lezi yena a to wuyisisa zona a makume ya mazana ya makume ya mazana ya vanhu a kuva va tlhela va hanya.