WONA a vanhu lava va kuwelako jaha legi. Wa mu tiva a ku hi mani? Loyi hi Jeremia. Yena muprofeti wa hombe nguvu wa Nungungulu.

Kutsongwani nzhako ka loku hosi Josia a sangulile ku fuvisa zifananiso lomu tikweni, Jehova i byela Jeremia lezaku a maha muprofeti Wakwe. Hambulezo, Jeremia i alakanya lezaku wa ha hi nwanana nguvu kasi ku a maha muprofeti. Kanilezi Jehova i ngalo i ta mu vuna.

Jeremia i byela vaIsraeli lezaku va nyima ku maha zilo zo biha. Yena i ngalo: ‘A vanungungulu lava va khozelwako hi vamatiko va mawunwa.’ Kanilezi a vaIsraeli vo tala va hlawula ku khozela zifananiso a ku hunza ku khozela Nungungulu wa lisine Jehova. Loku Jeremia a byela vanhu lezaku Nungungulu i ta va tsayisa hi kota ya wubihi gabye, vona vo mu hleka ntsena.

Ku hunza malembe. Josia afa, zonake loku ku hunzile tihweti tinharu a n’wana wakwe Jehoiakimu i maha hosi. Jeremia i simama ku byela vanhu ku ngalo: ‘Jerusalema gi ta loviswa loku nwina mu nga hunzuluki tindleleni ta nwina to biha.’ A vapristi va khoma Jeremia va kanyuluka vaku: ‘U fanele ku dawa hi lezi u wulako zilo lezo.’ Zonake vona va byela a tihosana ta Israeli ku ngalo: ‘Jeremia i fanele ku dawa, hakuva i wulawulile a vukela doropa ga hina.’

Zini a to maha Jeremia makunu? Yena a nga chavi! Yena i byela vontlhe ku ngalo: ‘Jehova i nzi rumelile ku ta wulawula zilo lezi ka nwina. Loku nwina mu nga hunzuluki mahanyeleni ya nwina yo biha, Jehova i ta lovisa Jerusalema. Kanilezi tiyisekani lezaku: Loku mu nzi daya, mu ta ngha mu daya wanuna a nga mahangiko kubiha.’

A tihosana ti tsika Jeremia a hanya, kanilezi a vaIsraeli a va hunzuluki tindleleni tabye to biha. Loku ku hunzile xikhati kuta Nebukadnezzare, a hosi ya Babuloni, a talwa ni Jerusalema. Hi kugumesa Nebukadnezzare i maha lezaku vaIsraeli vava zitiri zakwe. Yena i teka makume ya mazana yo tala ya vanhu vaya Babuloni. Alakanyela basi hi lezi zi nga wa tava zona a ku vanhu u nga va tiviko va ku kokovisela hi le kaya ka wena vaya na wena ka tiko u nga gi tiviko!