ANZHAKO ka loku Davida a dele Goliate, Abneri a nduna ya butho ga ka Israeli i mu neha ka Saule. Saule i xalaliswa nguvu hi Davida. Yena i mu maha nduna lomu buthweni gakwe a tlhela a mu teka lezaku a ya tshama ndlwini ya hosi.

Ka xinwani xikhati, loku a butho gi kari gi wuya hi le kulweni ni vaFilistia, a vavasati va yimbelela vaku: ‘Saule i dele makume ya mazana, kanilezi Davida i dele makume ya makume ya mazana.’ Lezo zi vanga xiluse ka Saule, hakuva Davida i nyikiwa wudzunzo go hunza legi gi nyikiwako Saule. Kanilezi Jonatani n’wana Saule a nga lusi. Yena i ranza nguvu Davida, na Davida wa mu ranzawu Jonatani. Hikwalaho vona va vambiri va tsumbisana lezaku va tava vanghana xontlhe xikhati.

Davida mubi wa mu nene nguvu wa xitende, niku Saule i ranza a wucenje legi yena a bako. Kanilezi a ka ginwani siku a kulusa ka Saule ku mu yisa kumaheni ka nchumu wo tshisa. Na Davida a kari aba xitende, Saule i teka a tlhari a gi hoxa, na aku: ‘Nzi ta gwaza Davida nzi mu patsa ni khurisi!’ Kanilezi Davida a vika, a tlhari gi mu phukwa. Anzhako ka lezo Saule i engeta a phukwa Davida hi tlhari. Hi kota ya lezo Davida wa zi tiva makunu a ku i fanele ku ti wonela nguvu.

Wa khumbula a xitsumbiso lexi Saule a xi mahileko? Yena i te ngalo i wa ta nyika a n’wana wakwe wa nhanyana ka wanuna loyi a deleko Goliate lezaku a maha sati wakwe. Hi magumo ya kona Saule i byela Davida ku ngalo za koteka a ku yena a teka n’wana wakwe Mikali, kanilezi hi kusangula i fanele ku daya a 100 wa valala vabye, a vaFilistia. Hi nga alakanyela lezo! Saule hakunene i rinzela lezaku a vaFilistia va ta daya Davida. Kanilezi a va zi koti ku maha lezo, hizalezo Saule i nyikela a n’wana wakwe a kuva sati wa Davida.

Ka siku go kari Saule i byela Jonatani ni malanza yakwe wontlhe lezaku yena i lava ku daya Davida. Kanilezi Jonatani i ngalo ka raru wakwe: ‘U nga mahi kubiha ha Davida. Yena cima a nga se ku onhela nchumu. Kanilezi, zontlhe lezi yena a mahileko zive xivuno xa hombe ka wena. Yena i enghenisile wutomi gakwe mhangweni a xikhati lexi a nga daya Goliate, ni laha u zi wonileko, u lo tsaka.’

Saule i ingisa n’wana wakwe, a tlhela a tsumbisa ku nga mahi kubiha ha Davida. Davida a wuyisiwa, a tlhela a tirela Saule ndlwini yakwe kota lezi a nga mahile kusanguleni. Hambulezo, a siku go kari na Davida a kari aba wucenje, Saule i engeta a hoxa a tlhari gakwe ka Davida. Davida a vika, zonake a tlhari giba a khurisi. Legi i khati ga wunharu! Davida wa zi tiva makunu lezaku i fanele ku tsutsuma!

Ka wusiku galego Davida i tlhela kaya kakwe. Kanilezi Saule i rumela vavanuna vo kari a ku ya mu daya. Mikali wa zi tiva lezi a raru wakwe a zi pimisako ku maha. Hikwalaho yena i byela a nuna wakwe ku ngalo: ‘Loku u nga tsutsumi a wusiku legi, manziko u tava u file.’ Galego wusiku Mikali i vuna Davida a ku huluka hi laha njhaneleni. Lomu ka xipimo xa ntlhanu wa malembe ni mambiri Davida i fanele ku hanya hi kufihlala kasi Saule a nga mu kumi.