NA DAVIDA a nga sefa, yena i lo nyika Solomoni a zikombiso za kuaka ka tempeli ya Jehova zi tako hi ka Nungungulu. Ka lembe ga wumune ga kufuma kakwe, Solomoni i sangula ku aka tempeli, yona yi teka a ntlhanu wa malembe ni mambiri ni khihlanya a kuva yi mbhela ku akiwa. Laha tempeleni ku tira makume ya makume ya mazana ya vavanuna, niku a muako lowo wu teka mali yo tala nguvu. Zi maha lezo hakuva ku tirisiwa nzalama ni siliva yo tala nguvu.

A tempeli yi na ni tikwarutu timbiri ta lisima, kota lezi gonawu tabernakeli gi nga hi nato. Kanilezi a tikwarutu leto ti hunza kumbiri leti ta tabernakeli hi wuhombe. Solomoni i maha lezaku a nghaxa ya xivumelwano yi vekiwa lomu ka kwarutu ya le nzeni nguvu ka tempeli, ni zinwani zilo lezi zi nga kari zi tshama tabernakelini zi vekiwa lomu ka kwarutu yinwani.

Laha a tempeli yi mbhelako, ku mahiwa mubuzo wa hombe. Solomoni i khizama mahlweni ka tempeli a khongela, kota lezi u zi wonako laha ka mufananiso. Solomoni aku ngalo ka Jehova: ‘Hambu lezi a tilo gontlhe gi nga ku eneliko, ku ta kuyini hi tempeli leyi ke. Kanilezi, O Nungungulu wa mina, maha wuxinji u ingisa a vanhu va wena loku va khongela na va kongomile a tlhelo ga seno ka wutshamu legi.’

Laha Solomoni a mbhetako mukhongelo wakwe, ku relela nzilo hi le tilweni. Wona wu hisa a miphahlo ya zihari leyi yi mahilweko. Zonake a kungangamela ka Jehova ku tata a tempeli. Lezo zi komba ku ngalo Jehova wa ingisa, niku yena wa xalala hi tempeli ni mukhongelo wa Solomoni. Wutshanwini ga tabernakeli, a tempeli makunu hi yona yi mahako wutshamu ga ku vanhu va ta khozela kona.

Hi xikhati xo leha Solomoni i fuma hi ndlela ya wutlhari, ni vanhu va tsaka. Kanilezi Solomoni i teka vavasati vo tala va manwani matiko lava va nga khozeliko Jehova. Wa mu wona a munwe wa vona na a kari a khozela xifananiso? Hi kugumesa a vasati vakwe va hambukisa Solomoni lezaku yenawu a khozela vanwani vanungungulu. Wa zi tiva lezi zi mahekako laha Solomoni a mahako lezo? Yena a nga ha hlayisi khwatsi vanhu. I maha wo biha, ni vanhu a va ha tsaki kambe.

Lezo zi maha Jehova a zangarela Solomoni, zonake a mu byela lezi: ‘Nzi ta ku wutlela mufumo nzi wu nyikela ka munwani wanuna. Nzi nga ta maha lezo kuhanyeni ka wena, kanilezi zi tava kufumeni ka n’wana wa wena. Kanilezi nzi nga ta wutlela n’wana wa wena a vanhu vontlhe va mufumo.’ A hi woneni lezi zi mahekisako zona.