MAYO! Ko khwatsi Danieli i lomu mhangweni ya hombe. Kanilezi a tinghala a ti mu bayisi! Wa zi tiva a ku hikuyini? Hi mani a nghenisileko Danieli lomu ni tinghala tontlhe leti? A hi zi poleni.

A hosi ya Babuloni makunu hi wanuna a vitwako Dariusi. Yena i ranza nguvu Danieli hakuva munhu wa mu nene ni wa wutlhari. Dariusi i hlawula Danieli lezaku a maha mufumeli-nduna lomu mufunweni wakwe. Lezo zi maha lezaku a vavanuna vanwani va lomu mufunweni va lusela Danieli, hikwalaho va maha pulani yo kari.

Vona va famba ka Dariusi va yaku: ‘Hi bohile xikungo, O hosi, xaku wena ngha u yimisa a nayo wu wulako ku ngalo a xikari ka 30 wa masiku ngha ku nga kumeki ni munhu a khongelako ka munwani nungungulu kutani munhu ahandle ka wena, O hosi. Loku munhu wo kari a wu hambunyeta, i fanele ku hoxiwa nkeleni wa tinghala.’ Dariusi a nga xi tivi a xigelo xaku a vavanuna lavo va lava lezaku ku yimisiwa a nayo lowo. Kanilezi yena i alakanya lezaku lawo mawonela ya ma nene, hikwalaho i tsalisa a nayo lowo. A nayo a wa ha zi koti ku hunzulwa makunu.

Laha Danieli a zwako nayo lowo, i famba kaya a ya khongela, khwatsi hi lezi a nga sina a maha xikhati xontlhe. A vavanuna lavo vo biha va wa zi tiva ku ngalo Danieli i wa nga ta tsika ku khongela ka Jehova. Va tsakile, hakuva ku woneka ku khwatsi a pulani yabye ya ku ti tlhatlha ka Danieli ya tira.

Laha Hosi Dariusi a tivako xigelo xaku vavanuna lavo va lavile lezaku ku yimisiwa a nayo lowo, i bayiseka nguvu. Kanilezi yena a nge zi koti ku hunzula a nayo, hizalezo i fanele ku laya lezaku Danieli a hoxiwa nkeleni wa tinghala. Kanilezi a hosi yi byela Danieli ku ngalo: ‘Nza tsumba ku ngalo Nungungulu wa wena, loyi u mu tirelako, i ta ku ponisa.’

Dariusi i karateka nguvu laha ka kuza a nga zi koti ku etlela wusikwini lego. Ni mixo wa kona yena i tsutsuma aya nkeleni wa tinghala. Wa zi kota ku mu wona kwalaho. Yena i kanyuluka aku: ‘Danieli, nanza ga Nungungulu a hanyako! A Nungungulu loyi u mu tirelako i zi kotile ku ku ponisa tinghaleni ke?’

Danieli i hlamula aku: ‘Nungungulu i rumele ngelosi yakwe yi ta vala milomu ya tinghala, hikwalaho a ti nzi bayisangi.’

A hosi yi tsakile nguvu. Yona yi laya lezaku Danieli a humesiwa hi lomu nkeleni. Zonake yi rumisa lezaku a vavanuna lavo vo biha va zamileko ku ti tlhatlha ka Danieli va hoxiwa tinghaleni. Hambu na va nga se chikela lehasi ka nkele, a tinghala ti va khamukela ti tshoveletela a marambu yabye wontlhe.

Makunu Hosi Dariusi i tsalela a vanhu vontlhe va lomu mufunweni wakwe aku ngalo: ‘Nza laya lezaku a vanhu vontlhe va fanele ku komba xichawo ka Nungungulu wa Danieli. Yena i maha zihlamaliso za hombe. I ponisile Danieli lezaku a nga giwi hi tinghala.’