KU HUNZILE xipanze xa malembe mambiri kusukela xikhatini lexi Babuloni gi khozisilweko hi vaMedi ni vaPersia. Hi nga wona lezi zi mahekako makunu! Ina, a vaIsraeli vo huma hi Babuloni. Va tlhatlhekisile kuyini? Himani a va tsikileko va famba?

Hi Kurusi, a hosi ya le Persia. Xikhatini xa kale nguvu na Kurusi a nga se ku pswaliwa, Jehova i rumile muprofeti wakwe Isaya lezaku a tsala xungetano hi yena, ku ngalo: ‘U ta maha lezi hakunene nzi zi lavako a kuva u zi maha. A tivati ti ta tsikiwa ti nga valiwangi kasi ku wena u khozisa a doropa.’ Kurusi hakunene i rangelile a kukhoziswa ka Babuloni. A vaMedi ni vaPersia va nghenile lomu doropeni ni wusiku hi laha tivatini ti nga tsikilwe ti nga valiwangi.

Kanilezi muprofeti wa Jehova, Isaya, i tlhelile a wula ku ngalo Kurusi i wa ta nyika a xileletelo xa lezaku Jerusalema ni tempeli ya gona zi akiswa. I zile Kurusi a nyika xileletelo lexo? Ina, i xi nyikile. Kurusi i byela lezi a vaIsraeli: ‘Fambani, zalezi, le Jerusalema mu ya aka a tempeli ya Jehova, Nungungulu wa nwina.’ A vaIsraeli lava va lomu ndleleni ya ku ya maha lezo futsi.

Kanilezi a hi vontlhe vaIsraeli va zi kotako ku teka a pfhumba lego ga hombe go tlhelela Jerusalema. I pfhumba ga hombe nguvu ga xipanze xa 800 wa tikilometuru ni lezaku a vo tala va khosahele nguvu kutani va babya nguvu laha ka kuza va nga zi koti ku famba a pfhuka wo lehisa lezo. Ku na ni zinwani zigelo zi mahako lezaku a vanhu vanwani va nga fambi. Kanilezi Kurusi i byela lava va nga fambiko, aku ngalo: ‘Nyikani siliva ni nzalama ni zinwani zinyikiwo ka vanhu lava va tlhelako a ku ya aka Jerusalema ni tempeli ya gona.’

Hikwalaho, ku nyikiwa zinyikiwo zo tala ka vaIsraeli lava va nga ndleleni yabye ya kuya Jerusalema. Kambe, Kurusi i va nyika a mingelo ni magombe lezi Hosi Nabukadnezzare a nga zi tekile le tempeleni ya Jehova xikhatini lexi a lovisileko Jerusalema. A vanhu va na ni zilo zo tala a kuva va zi rwala va tlhela nazo.

Loku ku hunzile xipanze xa mune wa tihweti na va ha enza, a vaIsraeli va chikela Jerusalema hi xikhati xi faneleko. Ku hunza a 70 wa malembe futsi kusukela kulovisweni ka doropa legiya, niku a tiko gi wa sele gi nga hi na munhu hi kumbhelela. Hambulezi a vaIsraeli va nga tikweni gabye makunu vona va tava ni zikhati zo kari za zikarato, kota lezi hi to zi gonza hi kulanzela.