WA ALAKANYA a ku tshuka u zwile zo kari xungetano hi majaha lawa ya manharu? Ina, lava hi vona a vanghana va Danieli lava va alileko kuga lezi zi nga bihile ka vona. A vaBabuloni va va chulile ku ngalo hi Xadrake, Mexake na Abed-nego. Kanilezi hi nga va cuwuka makunu. Hikuyini va nga khizamiko mahlweni ka xifananiso lexi xa hombe a ku fanana ni lava vanwani ke? A hi zi poleni.

Wa yi alakanya a milayo leyi yena Jehova wutsumbu a yi tsalileko yi vitwako ku ngalo Milayo ya Khume? A wo sangula ka yona hi lowu: ‘U nga khozeli vanwani vanungungulu ahandle ka mina.’ A majaha lawa laha mo lanzela a nayo lowo, hambulezi ku nga hiko nchumu wo hehuka a ku wu maha.

Nebukadnezzare, a hosi ya Babuloni, i rambile vanhu vo tala vo chaveka lezaku va ta dzunza a xifananiso lexo a xi yimisileko. Yena wa ha hi ku mbheta ku wulawula ka vanhu vontlhe aku ngalo: ‘Loku muzwa a kuvuma ka mipunzu, ka zitende ni ka zinwani zibya za wucenje, mu fanele ku khizama mu khozela a xifananiso lexi xa nzalama. Ni wihi loyi a nga khizamiko a xi khozela i ta hoxiwa ka xalexo xikhati lomu nzhimbyeni wa pingo ga nzilo.’

Laha Nabukadnezzare a tivako lezaku Xadrake, Mexake na Abed-nego a va khizamangi, i zangara nguvu. Yena i laya lezaku va nehiwa ka yena. Yena i va nyika xinwani xikhati xa kuva va khizama. Kanilezi a majaha lawa ma tsumba Jehova. Wona ma byela Nabukadnezzare ku ngalo: ‘Nungungulu wa hina loyi hi mu tirelako wa zi kota ku hi ponisa. Kanilezi hambu loku a nga hi ponisi, hi nga ta khizamela a xifananiso xa wena xa nzalama.’

Hi kuzwa lezo, Nebukadnezzare i engetelana nguvu ku zangara. Ku na ni nzhimbo laha kusuhani zonake yena i laya ku ngalo: ‘Hisisani nzhimbo a ntlhanu wa makhati ni mambiri a ku hunza lezi wu nga kari wu hisiswa zona!’ Hi kulanzela i laya vavanuna va tinhenha va butho gakwe lezaku va boha Xadrake, Mexake na Abed-nego va va hoxa nzhimbyeni. A nzhimbo wu hisa nguvu laha ka kuza ku dawa vavanuna lavo va tinhenha hi malangavi. Kanilezi ku ta ku yini hi majaha lawa ma hoxilweko lomo?

A hosi yi hlomela lomu nzhimbyeni, zonake yi khonwa hi kuchava ka hombe nguvu. Yona yi wutisa yiku: ‘A hi bohangi vavanuna vanharu hi va hoxa lomu nzhimbyeni wa pingo ga nzilo ke?’

A malanza yakwe ma hlamula maku: ‘Ina, hi zona hi nga maha.’

Yena aku ngalo: ‘Kanilezi nzi wona a mune wa vavanuna na va kari va fambafamba xikari ka nzilo. A va bohiwangi, niku a nzilo a wu va hisi. Ni loyi wa wumune i fanana ni nungungulu.’ A hosi yi tshinela laha nyangweni ya nzhimbo yi kanyuluka yiku: ‘Xadrake! Mexake! Abed-nego! Humani handle, nwina malanza ya Nungungulu a Hunzeleleko Kutlakuka!’

Laha vona va humako, a vanhu vontlhe va zi wona ku ngalo a va swangi. Hikwalaho a hosi yi ngalo: ‘Ngha a dumiswa a Nungungulu wa Xadrake, Mexake na Abed-nego! Yena i rumelile a ngelosi yakwe yi ta va ponisa hakuva vona va wa nga ta khizama va khozela munwani nungungulu ahandle ka loyi wabye.’

Xana lexo a hi xikombiso xa xi nene xa kutsumbeka mahlweni ka Jehova lexi hi felako ku xi lanzelake?