KU MAHEKILE nchumu wo tshisa. Johani Mubapatizi wa ha hi ku dawa. Herodia, a kata hosi, i wa nga mu ranzi. Hikwalaho yena i zi kotile ku maha lezaku a hosi yi laya a ku a hloko ya Johani yi tsemiwa.

Laha Jesu a zwako lezo, i bayiseka nguvu. Zonake i famba ka wutshamu ga xiwula na a hi yece. Kanilezi a vanhu va mu lanzela. Laha Jesu a wonako zidlemo lezo, i zi zwela wusiwana. Hikwalaho i wulawula navo xungetano hi mufumo wa Nungungulu, a tlhela a hanyisa lava va babyako.

Ka gambo galego a vapizani vakwe vata ka yena va taku: ‘Gi pelile, niku a wutshamu legi xiwula. Tlhelisa vanhu kasi va fela ku ti xavela zakuga ka zidoropana zi nga lomu kusuhani.’

Jesu a hlamula aku: ‘A zi laveki akuva va famba. Va heni zakuga nwina.’ Na a hunzulukela Filipu, Jesu i wutisa ku ngalo: ‘Hi ta xava kwihi zakuga zo enela ku phamela a vanhu vontlhe lava ke?’

Filipu a hlamula: ‘Ku ta laveka a mali yo tala nguvu a ku xava zakuga zo enela kasi ku vontlhe va zi kota ku kuma zitsongwani ntsena.’ Zalezo Andreu i ngalo: ‘A mufana loyi, a khomako zakuga za hina, i na ni ntlhanu wa zibaba ni tinjhanjhi timbiri. Kanilezi zi nga ta zi kota ku enelela a vanhu vontlhe lava.’

Jesu aku ngalo: ‘Byelani vanhu lezaku va tshama hasi laha byanyini.’ Zonake yena a bonga Nungungulu hi zakuga, anzhako a sangula ku zi khemelela. Hi kulanzela, a vapizani va avanyisela a zibaba ni tinjhanjhi ka vanhu vontlhe. Ku na ni 5.000 wa vavanuna, ni makume ya mazana yo tala kambe ya vavasati ni vanana. Vona vontlhe vaga kala va xura. Ni laha a vapizani va hlengeletelako a matlhatlha, ku tala a 12 wa zirunzu!

Jesu makunu i leletela vapizani vakwe a kuva va enghena ka ngalava lezaku va tlhatuka a Bimbi ga Galilea. Laha wusikwini ku pupuxa a mheho ya hombe, ni mabyandlati ma ndlengandlengisa a ngalava. A vapizani va khonwa hi kuchava ka hombe nguvu. Zonake, laha xikari ka wusiku, vona va wona munhu na a famba hehla ka mati a va tshinelela. Vaba tihuwa hi kuchava, hakuva a va xi tivi lexi va xi wonako.

Jesu aku ngalo: ‘Mu nga chavi. Hi mina!’ Hambulezo a va kholwi. Hikwalaho Pedro i ngalo: ‘Loku ku hi wena hakunene, Hosi, nzi byele nzi famba hehla ka mati nzita ka wena.’ Jesu a hlamula aku: ‘Tana!’ Zalezo Pedro i huma ngalaveni a famba hehla ka mati! Kanilezi i khonwa hi kuchava zonake a sangula ku mbombomela, Jesu makunu a mu ponisa.

Loku ku hunzile xikhati, Jesu i tlhela a phamela makume ya mazana ya vanhu kambe. Ka khati legi i va phamela hi ntlhanu wa zibaba ni zimbiri ni tinjhanjhi titsongwani. Kwalaho kambe ku kumeka zakuga zo tala nguvu zo enela vontlhe. A yi hlamalisi a ndlela leyi Jesu a hlayisako hi yona a vanhu? Loku yena a fuma kota hosi ya Nungungulu cima hi nga ta karateka hi nchumu!