ANZHAKO ka kuva va humile hi lomu ndlwini ya le hehla, Jesu ni vapostoli vakwe vaya sinwini ga Getsemane. Vona va wa sina vata laho makhati yo tala mahlweni ka lezo. Jesu makunu i va leletela a ku tshama na va khindlimukile ni lezaku va khongela. Zonake i famba pfhukana, a yawa hasi hi nghohe a khongela.

Anzhako ka xikhati Jesu i wuya laha a vapostoli vakwe va nga kona. U alakanya lezaku vo maha yini? Vo etlela wurongo! Jesu i va byela makhati manharu lezaku va fanele ku tshama na va khindlimukile, kanilezi a khati ni khati a wuyako i va kuma na va etlela wurongo. Laha Jesu a wuyako ka khati go gumesa i ngalo: ‘Hikuyini mu etlelako ka xikhati xo khwatsi hi lexi ke? Xi chikele xikhati xa kuva nzi nyikelwa ka valala va mina.’

Ka xalexo xikhati ku zwala guwa ga xidlemo xa hombe. Hi nga wona! Kuta vavanuna na va welele tisupado ni zigomba! Niku va khomile minwenge kasi ku woninga hi yona. Laha va tshinelako, ku huma munhu hi lomu ka xidlemo a kongoma Jesu. Yena iya a ya mu pswopswa, kota lezi u zi wonako kwalaha. A wanuna loye hi Judasi Iskarioti! Hikuyini a pswopswako Jesu?

Jesu i wutisa lezi: ‘Judasi, wo nzi tokometa hi kupswopswa ke?’ Ina, a kupswopswa loko xikombiso. Lezo zi tivisa a vavanuna va nga na Judasi lezaku gayani hi Jesu, yaloye va mu lavako. Hikwalaho a valala va Jesu va tshinela lezaku va mu khoma. Kanilezi Pedro a nga ta va tsika va teka Jesu na a nga lwangi. Yena i hlomula a supado leyi a tileko nayo aba a wanuna a nga kusuhani naye. A supado yi phukwa a hloko ya wanuna loye zonake yi mu tsema a ndleve yakwe ya xinene. Kanilezi Jesu i khumba a ndleve ya wanuna loye, a yi holisa.

Jesu i byela Pedro ku ngalo: ‘Tlhelisa a supado ya wena wutshanwini ga yona. A wu pimisi ku ngalo nza zi kota ku kombela a Dadani wa mina a nzi rumelela makume ya mazana ya tingelosi lezaku ti ta nzi ponisa?’ Ina, yena wa zi kota! Kanilezi Jesu a nga kombeli lezaku Nungungulu a mu rumelela tingelosi, hakuva wa zi tiva ku ngalo xi chikele xikhati xa ku a valala vakwe va mu teka. Hikwalaho yena i va tsika va famba naye. A hi woneni lezi zi humelelako Jesu makunu.