HI NGA wona Jesu na a tshamile laha. Yena o gonzisa vontlhe vanhu lava va nga xitsungeni le Galilea. Lava va tshamileko kusuhani nguvu naye vapizani vakwe. Yena i hlawulile a 12 wa vona lezaku va maha vapostoli. A vapostoli vapizani vo hlawuleka va Jesu. Wa ma tiva a mavito yabye?

Ku na na Simoni Pedro ni makabye wakwe Andreu. Zonake ku na na Jakobe na Johani, va nga va ka makabye na vonawu. Munwani mupostoli i vitwa ku ngalo hi Jakobe na yenawu, ni munwani i vitwa ku ngalo hi Simoni yenawu. Vapostoli vambiri va na ni vito ga Judasi. Munwe hi Judasi Iskarioti, ni loyi munwani Judasi i vitwa hi vito ga Tadeu kambe. Zonake ku na na Filipu na Nataneli (a vitwako kambe ku ngalo hi Bartolomeu), Mateu na Tomasi.

Anzhako ka kuva a wuyile hi le Samaria, Jesu i lo sangula ku xumayela hi khati go sangula: ‘A mufumo wa matilo wu laha kusuhani.’ Wa zi tiva a ku xini mufumo lowo? Wukosi ga lisine ga Nungungulu. Jesu hi yena hosi ya wona. Yena i ta fuma na a hi le tilweni zonake a neha kurula misaveni. Yontlhe misava yi ta mahiwa paradise go saseka hi mufumo wa Nungungulu.

Jesu i laha a gonzisa a vanhu xungetano hi mufumo. Yena i tlhamusela lezi: ‘Mu fanele ku khongelisa lezi: Dadani wa Hina wa le tilweni, a vito ga wena a gi dzunziwe. A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.’ A vanhu vo tala va wu vitana a ku ‘Mukombelo wa Hosi.’ Vanwani va wu vitana a ku ‘Dadani wa Hina.’ Wa zi kota a ku wu wula a mukhongelo lowo wontlhe?

Jesu i tlhela a gonzisa vanhu hi lezi va faneleko ku hlayisisana zona. Yena i ngalo: ‘Mahelani vanwani lezi mu lavako lezaku vona va mu mahela.’ A wu zi ranzi loku vanwani va ku hlayisa hi ndlela yi nene? Hikwalaho, Jesu i ngalo, hi fanele ku hlayisa vanhu vanwani hi ndlela yi nene. Zi nga ta saseka le paradiseni ya misava laha vanhu vontlhe va to maha lezo ke?