HI NGA wona a tuva legi gi relelako gita hlokweni ya wanuna loyi. A wanuna loyi hi Jesu. I na ni xipimo xa 30 wa malembe makunu. Ni wanuna loyi a nga naye hi Johani. Hi sina hi gonzile zo kari ha yena. Wa alakanya a xikhati lexi Maria a ngaya a ya vuxela a xaka gakwe Elizabeti, ni xinwanana xi nga hi lomu nzeni ka Elizabeti xi tlula hi kutsaka? A xinwanana lexo xi nga kala xi nga se belekwa ku wa hi Johani. Kanilezi zini lezi Johani na Jesu va mahako makunu?

Johani wa ha hi ku nyupeta Jesu lomu matini ya Congo wa Jordani. A munhu i bapatizwa hi ndlela leyo. Hi kusangula, yena i nyupetwa hi kumbhelela lomu matini, a tlhela a humesiwa. Kota lezi ku nga zalezo Johani a mahako ka vanhu, yena i vitanwa ku ngalo hi Johani Mubapatizi. Kanilezi hikuyini Johani a bapatizileko Jesu?

Ina, Johani i mahile lezo hakuva Jesu i lota a ta kombela Johani lezaku a mu bapatiza. Johani i bapatiza vanhu lava va lavako ku komba lezaku va ti sola hi zilo zo biha lezi va mahileko. Kanilezi wa tshuka Jesu a maha zilo zo biha kasi ku a ti sola hi zona? Ahihi, Jesu cima a nga se zi maha, hakuva yena ha yece i N’wana wa Nungungulu wa le tilweni. Hikwalaho yena i kombelile Johani akuva a mu bapatiza hi xigelo xinwani. A hi woneni ku ngalo xigelo muni lexo.

Na Jesu a nga se kuta laha ka Johani, i wa hi muvatli. A muvatli munhu a mahako zilo hi mapulango, zo kota timeza ni tikadera hambu tibakwa. Josefa a nuna wa Maria i wa hi muvatli, niku yena i gonzisile Jesu lezaku a maha muvatli na yenawu. Kanilezi Jehova a nga rumelangi N’wana wakwe a kuta laha misaveni lezaku a ta maha muvatli. Jehova i na ni ntiro wo hlawuleka a lavako lezaku yena a wu maha, niku xi chikele xikhati xa ku Jesu a sangula ku wu maha. Hikwalaho kasi ku komba lezaku i tele ku ta maha a kuranza ka Dadani wakwe makunu, Jesu i kombela lezaku Johani a mu bapatiza. Wa xalaliswa Nungungulu hi lezo?

Ina, wa xalaliswa, hakuva, anzhako ka loku Jesu a humile hi lomu matini, ku zwala gezu hi le tilweni gi ku ngalo: ‘Loyi hi N’wana wa mina, loyi nzi xalalako hi yena.’ Kambe, ku woneka ku khwatsi a matilo mo vululeka ni tuva legi gi relela gita hehla ka Jesu. Kanilezi a hi tuva ga lisine. Ntsena go fanana na gona. Hi lisine i moya wa ku basa wa Nungungulu.

Lezi makunu Jesu i na ni zilo zo tala a faneleko ku ehleketa hi zona, hikwalaho i suka a famba wutshanwini legi a yako a ya kumeka a hi yece hi 40 wa masiku. Kwaseyo Satani i lo mu tela. Satani i zama a zikhati zinharu a ku kurumeta Jesu lezaku a maha zilo zi tshovako milayo ya Nungungulu. Kanilezi Jesu a nga ta zi maha.

Anzhako ka loku Jesu a wuyile i tlhangana ni vavanuna vo kari lava va mahako valanzeli vakwe vo sangula, kutani vapizani. A mavito ya vo kari vabye hi Andreu, Pedro (a vitwako kambe ku ngalo hi Simoni), Filipu na Nataneli (a vitwako kambe ku ngalo hi Bartolomeu). Jesu ni vapizani lavo va vaswa va suka vaya mugangeni wa Galilea. Le Galilea va nyima doropeni ga Kana lomu Nataneli a tako hi kona. Kwalaho Jesu iya mubuzweni wa hombe wa muchado, a ya maha a xihlamaliso xakwe xo sangula. Wa zi tiva a ku xini? Yena i hunzula mati ma maha vinya.