WA YI wona a nyeleti liyani yo ngangamela yi xungetiwako hi munwe wa vavanuna lava? Loku va sukile hi Jerusalema, ku lo woneka a nyeleti leyi. A vavanuna lava vata hi le Mutsuwuka-gambo, niku vona vagonzi va tinyeleti. Vona va kholwa lezaku a nyeleti leyi ya yiswa yi va yisa ka munhu wo kari wo hlawuleka.

Loku vavanuna lavo va chikele Jerusalema, va lo wutisa: ‘I kwihi a nwanana loyi a to maha hosi ya vaJuda?’ “Vajuda” i ginwani vito ga vaIsraeli. A vavanuna lavo va te ngalo: ‘Hi wonile a nyeleti ya nwanana loye hi kusangula na hi hi le Mutsuwuka-gambo, hikwalaho hi tele ku ta mu khozela.’

Loku Herodi, loyi a nga hosi le Jerusalema, a zwile lezo i lo karateka nguvu. Yena i wa nga lavi lezaku ku humelela yinwani hosi kasi yi fela ku mu tekela wutshamu. Hikwalaho Herodi i lo vitana vapristi va hombe a va wutisa: ‘Hi kwihi yi to pswaliwa a hosi yi tsumbisilweko?’ Vona va lo hlamula vaku: ‘A Biblia gi ngalo hi le Betlehema.’

Zonake Herodi i lo vitana a vavanuna va le Mutsuwuka-gambo, aku: ‘Fambani mu ya lavisisa khwatsi a nwanana loye. Loku mu mu kuma, nzi tiviseni. Minawu nzi lava kuya mu khozela.’ Kanilezi, hi lisine, Herodi i wa lava ku kuma a nwanana loye a fela ku mu daya!

Zonake a nyeleti yi ranga mahlweni ka vavanuna yi kongoma Betlehema, yi ya nyima hehla ka wutshamu legi a nwanana a nga kona. Laha a vavanuna va enghenako lomu ndlwini, va kuma Maria ni nwanana tsongwani Jesu. Vona va humesa zinyikiwo va nyika Jesu. Kanilezi anzhako ka xikhati Jehova i laya vavanuna lavo hi lomu ka noro lezaku va nga ha tlheli hi ka Herodi. Hikwalaho vona va tlhelela tikweni gabye hi yinwani ndlela.

Laha Herodi a tivako lezaku a vavanuna va le Mutsuwuka-gambo va tlhelile kaya, i zangara nguvu. Hizalezo yena i laya ku ngalo vontlhe vafana va lomu Betlehema va tanga ya malembe mambiri ni kuya hasi va fanele ku dawa. Kanilezi Jehova i tivisa Josefa na xi nga se chikela a xikhati lexo hi lomu ka noro, zonake Josefa i rura ni ngango wakwe vaya Gipite. Anzhako, laha Josefa a tivako lezaku Herodi i file, i teka Maria na Jesu va tlhelela kaya le Nazareta. Laho hi kona a kulelako kona Jesu.

U alakanya a ku himani a mahileko lezaku a nyeleti liyani yi ngangamela? Khumbula, a vavanuna lavo hi kusangula va yile Jerusalema anzhako ka kuva va wonile a nyeleti. Satani Diyabu i wa lava ku daya a N’wana wa Nungungulu, niku i wa zi tiva ku ngalo Hosi Herodi wa le Jerusalema i wa ta zama ku mu daya. Hikwalaho zi te dlunya ku ngalo Satani hi yena a mahileko lezaku a nyeleti liyani yi ngangamela.