LAHA a masiku ma hunzako, Jesu i ti wonekisa ka valanzeli vakwe a zikhati zo tala. Ka xinwani xikhati i woniwa hi xipimo xa 500 wa vapizani. Laha a wonekako kabye, wa zi tiva lezi Jesu a wulawulako hi zona ka vona? I wulawula hi mufumo wa Nungungulu. Jehova i rumele Jesu misaveni lezaku a ta gonzisa hi Mufumo. Zonake yena i simama ku maha lezo hambu anzhako ka kuvuxiwa kakwe hi ka vafileko.

Wa khumbula a ku xini mufumo wa Nungungulu? Ina, a Mufumo wukosi ga lisine ga Nungungulu wa le tilweni, niku Jesu hi Yena a hlawulilweko hi Nungungulu lezaku ava hosi. Kota lezi hi gonzileko, Jesu i kombile ku ngalo i tava hosi ya yinene hi ku phamela lava va nga hi ni ndlala, hi ku hanyisa vababyi, hambu hi ku tlhela a vuxa vafi!

Hikwalaho loku Jesu a fuma kota hosi le tilweni hi khume ga mazana ya malembe, yi ta tshamisa kuyini misava? Ina, a misava yontlhe yi ta mahiwa paradise go saseka. Ku nga ha tava kona tiyimpi, wugevenga, mababyi, hambu ni kufa. Ha zi tiva lezaku lezo lisine hakuva Nungungulu i mahile misava akuva yiva paradise legi vanhu va felako ku hanya ka gona. Hizalezo yena i mahile a simu ga Edeni kusanguleni. Niku Jesu i ta maha lezaku lezi Nungungulu a lavako lezaku zi maheka zi tatiseka hi magumo.

Ku chikela xikhati makunu xa ku Jesu a tlhelela tilweni. Jesu i ti wonekisile ka vapizani vakwe hi 40 wa masiku. Hikwalaho vona va tiyiseka lezaku yena wa hanya. Kanilezi na a nga se ku siya vapizani vakwe yena i va leletela lezi: ‘Tshamani Jerusalema kala mu amukela a moya wa ku basa.’ A moya wa ku basa i ntamu wu tiriswako hi Nungungulu, a ku fanana ni moya wu pupuxako, lowu wu to vuna a valanzeli vakwe a ku maha kuranza ka Nungungulu. Hi kugumesa, Jesu i ngalo: ‘Mu fanele ku xumayela ha mina kala le magemeta-musi ya misava.’

Anzhako ka kuva Jesu a wulile lezo, ku maheka nchumu wo hlamalisa. Yena i sangula ku tlakukela tilweni, kota lezi u zi wonako kwalaha. Zonake i fihliwa hi refu a nga ha woneki, niku hizalezo a vapizani a va mu woni kambe. Jesu iya tilweni, a tlhela a sangula ku fumela valanzeli vakwe misaveni hi kwaseyo.