GAYANI a yimileko hi mupostoli Pedro, niku lava va nga le nzhako kakwe hi vo kari va vanghana vakwe. Kanilezi hikuyini wanuna loyi a khizamelako Pedro ke? Xana i fanele ku maha lezo? Wa mu tiva a ku himani?

A wanuna loyi hi Korneliu. Yena i munwe wa tinduna ta butho ga Roma. Korneliu a nga mu tivi Pedro, kanilezi yena i leletelwe a ku mu vitana lezaku ata mutini wakwe. A hi poleni lezi zi nga mahekisa zona lezo.

A valanzeli vo sangula va Jesu va wa hi vaJuda, kanilezi Korneliu a hi muJuda. Hambulezo yena wa ranza Nungungulu, wa khongela ka yena, niku wa maha zilo zo tala za zi nene ka vanwani vanhu. Makunu, ka gambo go kari ku woneka kakwe a ngelosi yiku ngalo: ‘Nungungulu wa xalala hi wena, niku i ta hlamula a mikombelo ya wena. Rumela vavanuna lezaku va ya teka a wanuna wo kari a vitwako Pedro. Yena i le Jopa le mutini wa Simoni, loyi a tshamako kusuhani ni bimbi.’

Ina, ka xalexo xikhati Korneliu i rumela vavanuna lezaku va ya lava Pedro. Ka siku gi lanzelako, laha a vavanuna lavo va tshinelako Jopa, Pedro i le hehla ka yindlu ya Simoni. Kwaseyo Nungungulu i maha lezaku Pedro a alakanya ku ngalo o wona a nguwo ya hombe na yi relela hi le tilweni. Lomo ka nguwo leyo ku na ni tixaka tontlhe ta zihari. Maringano ni nayo wa Nungungulu, a zihari lezo zi wa nga hlazekangi kasi ku giwa, hambulezo a gezu go kari gi ngalo: ‘Sekeleka, Pedro. Daya uga.’

Pedro i hlamula aku: ‘Ahihi! Cima a nzi sega zilo zi nga hlazekangiko.’ Kanilezi a gezu lego gi ngalo ka Pedro: ‘Tsika ku wula ku ngalo a zi hlazekangi a zilo lezi Nungungulu makunu a nge ngalo zi basile.’ Lezo zi maheka makhati manharu. Na Pedro a ha lava ku tiva ku ngalo zi wula yini zontlhe lezo, a vavanuna va rumelweko hi Korneliu va chikela laha mutini va lava Pedro.

Pedro i chika hasi a taku ngalo: ‘Hi mina a wanuna loye mu mu lavako. Mu tele yini?’ Laha a vavanuna lavo va tlhamuselako lezaku Korneliu i leletelwe hi ngelosi a ku ta vitana Pedro kasi kuya mutini wakwe, Pedro i vumela ku famba navo. Hi manziko wa kona Pedro ni vanghana vakwe va suka va enzela Korneliu le Kesaria.

Korneliu i tsombanyisile maxaka ni vanghana vakwe va hombe. Laha Pedro a chikelako, Korneliu wa mu khinga. Yena iwa hasi a khizama mikonzweni ya Pedro, kota lezi u zi wonako kwalaha. Kanilezi Pedro i ngalo: ‘Suka u yima; mina nzi munhu ntsena.’ Ina, a Biblia gi komba lezaku a zi lulamangi ku khizamela ni ku khozela munhu. Hi fanele ku khozela Jehova ntsena.

Pedro makunu i xumayela ka lava va tsombeneko. Yena i ngalo: ‘Nzi wona lezaku Nungungulu wa vumela vanhu vontlhe lava va lavako ku mu tirela.’ Niku laha a wulawulako, Nungungulu i rumela moya wakwe wa ku basa, zonake a vanhu lavo va sangula ku wulawula tirimi to hambanahambana. Lezo zi hlamalisa a vapizani va vaJuda lava va tileko na Pedro, hakuva vona va wa alakanya lezaku Nungungulu i tsakela vaJuda ntsena. Hikwalaho lezo zi va gonzisa ku ngalo Nungungulu a nga woni vanhu va lihi lixaka kota va chukwana kutani va lisima nguvu ka Nungungulu a ku hunza vanhu va tinwani tixaka. A hi nchumu wa wu nene lowo hi faneleko hontlheni a ku wu alakanya?