A VANHU lava va nga laha valanzeli va Jesu. Va ingisile a xileletelo xakwe xa ku tshama Jerusalema. Niku laha vona vontlhe va rinzelako zinwe, a yindlu yontlhe yi tala hi guwa ga hombe. Ku zwala ku khwatsi i moya wa hombe wa ntamu. Makunu ku sangula ku woneka tirimi ta nzilo hehla ka hloko ya munwe ni munwani wa vapizani. Wa wu wona a nzilo hehla ka munwe ni munwani wabye? Zi wula yini zontlhe lezo ke?

Lexo xihlamaliso! Jesu i le tilweni zinwe ni Dadani wakwe, zonake yena o chulula a moya wa ku basa wa Nungungulu hehla ka valanzeli vakwe. Wa zi tiva lezi va zi kotako ku maha hi moya lowo? Vontlhelele va sangula ku wulawula tirimi to hambanahambana.

A vanhu vo tala lomu Jerusalema vazwa a guwa gi zwakalako ku khwatsi i moya wa hombe, hizalezo vata a ku ta wona lezi zi humelelako. A vo kari xikari ka vanhu lavo vanhu va manwani matiko va tileko laho hi kota ya mubuzo wa Israeli wa Pentekosta. Hi nga wona a xihlamaliso va xi kumako a vapfhumba lavo! Vazwa a vapizani na va wulawula tirimi tabye xungetano hi zilo zo hlamalisa lezi Nungungulu a zi mahileko.

A vapfhumba lavo ve ngalo: ‘A vanhu lava vontlhe va le Galilea. Zi mahisa kuyini, makunu, a ku va zi kota ku wulawula tirimi leti to hambanahambana ta le matikweni lawa hi tako hi ka wona ke?’

Pedro makunu i suka a yima a fela ku va tlhamusela. I tlakusa a gezu gakwe a byela vanhu lezi Jesu a nga dayisiswa zona niku Jehova i mu vuxile hi ka vafileko. Pedro i simama aku: ‘Zalezi Jesu i le tilweni le canjeni ga xinene ga Nungungulu. Niku i lo chulula a moya wa ku basa lowu wu tsumbisilweko. Kuve hi lezo mu nga wona ni kuzwa a zihlamaliso lezi.’

Zonake, laha Pedro a wulako zilo lezo, a vo tala xikari ka vanhu lavayani va bayiseka nguvu hi lezi zi mahilweko Jesu. Vona va wutisa vaku: ‘Hi fanele ku maha yini?’ Pedro i va byela ku ngalo: ‘Ku laveka lezaku mu hunzulusa a mahanyela ya nwina mu tlhela mu bapatizwa.’ Hikwalaho ku bapatizwa a xipimo xa 3.000 wa vanhu nzeni ka galego siku zonake va maha valanzeli va Jesu.