U NGA wula lezi a xinhanyatana lexi ni vanghana va xona va lerako? Ina, hi gona a bhuku galegi u gi lerako — Bhuku Ga Mina Ga Mahungu Ya Biblia. Niku vona vo lera a tlhatlhambuto walowu u wu lerako — “Hi Nga Zi Kotisa Kuyini Ku Hanya Kala Kupinzuka.”

Wa zi tiva lezi va zi gonzako? A xo sangula, va gonza lezaku loku hina hi lava ku hanya kala kupinzuka hi fanele ku tiva Jehova ni N’wana wakwe Jesu. A Biblia gi ngalo: ‘A ndlela ya ku hanya kala kupinzuka hi leyi. Ku gonza xungetano hi Nungungulu yece wa zinene, ni N’wana loyi a mu rumeleko misaveni, Jesu Kristu.’

Hi nga gonzisa kuyini xungetano hi Jehova Nungungulu zinwe ni N’wana wakwe Jesu ke? A yinwe ndlela hi ku lera a Bhuku Ga Mina Ga Mahungu Ya Biblia kusukela kusanguleni kala magumo. Gona gi hlawutela zo tala xungetano hi Jehova na Jesu, a hi zona? Niku gonawu gi hlawutela zo tala xungetano hi zilo lezi vona va zi mahileko zinwe ni zilo lezi va ha ta zi mahako. Kanilezi hi fanele ku maha zinwani ahandle ka ku lera a bhuku legi ntsena.

Wa gi wona a bhuku ginwani legi gi nga lahasi? I Biblia. Lava a munhu wo kari lezaku a ku lerela a zipanze za Biblia lomu yi seketelwako kona a mitlhatlhambuto ya bhuku legi. A Biblia gi hi nyika a mahungu wontlhe lawa ma lavekako lezaku hina hontlhe hi zi kota ku tirela Jehova hi ndlela ya zinene hi fela ku kuma a wutomi ga pinzukelwa. Hikwalaho hi fanele ku tolovela ku gonza a Biblia zikhati zo tala.

Kanilezi a ku gonza ntsena xungetano hi Jehova Nungungulu zinwe na Jesu Kristu a zi eneli. Hi wa ta zi kota kuva ni wutivi ginyingi xungetano hi tigonzo tabye, hambulezo hi nga kumi wutomi ga pinzukelwa. Wa zi tiva zinwani zi lavekako?

Ka laveka kambe lezaku hi hanya maringano ni zilo lezi hi zi gonzako. Wa mu alakanya Judasi Iskarioti? Yena i wa hi munwe wa lava va 12 va hlawulilweko hi Jesu lezaku va maha vapostoli vakwe. Judasi i wa hi ni wutivi ginyingi xungetano hi Jehova na Jesu. Kanilezi zini zi nga mu humelela? Anzhako ka xikhatanyana yena i lo maha munhu wa makangwa, a tlhela a tokometa Jesu ka valala vakwe hi 30 wa zingerengere za siliva. Hikwalaho Judasi a nga ta amukela a wutomi ga pinzukelwa.

Wa mu alakanya Gehazi, a wanuna loyi hi gonzileko hi yena ka Tlhatlhambuto 69? Yena i lo navela ku teka tinguwo ni mali zi nga kala zi nga mu lumbi. Hizalezo i lo hemba wunwa kasi ku kuma zilo lezo. Kanilezi Jehova i mu tsayisile. Niku yena i ta hi tsayisawu loku hi nga ingisi milayo yakwe.

Kanilezi ku na ni vanhu vo tala va va nene va tireleko Jehova xikhati xontlhe hi kutsumbeka. Hi lava ku fanana navo, a hi zona? Mufanyana Samueli xikombiso xa xi nene xa kuva hi xi lanzela. Khumbula, kota lezi hi nga zi wona ka Tlhatlhambuto 55, yena i wa hi ni tanga ya mune kutani ntlhanu wa malembe ntsena a xikhati lexi a nga sangula ku tirela Jehova tabernakelini gakwe. Hikwalaho a ku khataliseki lezaku u mutsongwani kala kwihi, wena a wu mutsongwani nguvu kasi ku tirela Jehova.

Hi lisine, a munhu loyi hina hontlhe hi lavako ku mu lanzela hi Jesu Kristu. Hambu xikhatini lexi a nga hi mufana, kota lezi zi kombilweko ka Tlhatlhambuto 87, yena i wa hi le tempeleni na a wulawula ni vanwani xungetano hi Dadani wakwe wa le tilweni. A hi lanzeleni xikombiso xakwe. A hi bhuleleni vontlhe lava hi zi kotako ku va bhulela xungetano hi Jehova a Nungungulu wa hina wo hlamalisa zinwe ni N’wana wakwe, Jesu Kristu. Loku hi maha zilo lezo, hi ta zi kota ku hanya kala kupinzuka lomu paradiseni giswa ga Nungungulu misaveni.