A Muvangi wa hina i tlharihile a ku hi hunza. Kota Dadani wa liranzo, yena wa hi khatalela. Ahandle ka lezo, a nga hi vangelangi lezaku hi ti fumela. (Jeremia 10:23) Hikwalaho, a ku fana ni lezi a xinwanana xi nga ni xilaveko xa ku rangelwa hi vapswali, hontlheni hi na ni xilaveko xa ku rangelwa hi Nungungulu. (Isaya 48:17, 18) A matshinya ya milayo ya Biblia ma hi nyika wurangeli legi gi nga xinyikiwo xi tako hi ka Nungungulu. — Gonza 2 Timote 3:16.

A milayo ni matshinya ya milayo ya Jehova zi hi gonzisa a mahanyela ya chukwana zezi zi tlhela zi hi komba a makumela ya makatekwa ya pinzukelwa xikhatini xi tako. Kota lezi ku nga Nungungulu a nga hi vanga, zi lulamile a kuva hi vumela a wurangeli gakwe hi kutsaka. — Gonza Tisimu 19:7, 11; Kuvululelwa 4:11.

A matshinya ya milayo ya Biblia ku wuliwa milayo-tshinya leyi a yinwani milayo yi seketelwako ka yona. Kuveni a milayo yi nga ha tiriselwa ziyimo zo kongoma. (Deuteronome 22:8) Hi fanele ku tirisa a wuzikoti ga hina ga ku alakanyela kasi ku zwisisa lezi a matshinya ya milayo ma tirisako zona ka xiyimo xo kari. (Mavingu 2:10-12) Hi xikombiso, a Biblia gi gonzisa lezaku a wutomi xinyikiwo xi tako hi ka Nungungulu. A tshinya lego ga nayo gi nga hi rangela ntirweni, le kaya, ni kuenzeni. Gi hi kuca a ku maha zontlhe hi zi kotako kasi ku potsa timhango. — Gonza Mitiro 17:28.

Jesu i wulawulile hi matshinya mambiri ya milayo lawa ma nga  ya lisima nguvu ka wontlhe. A go sangula gi komba a kungo ga wutomi ga vanhu—ku nga ku tiva Nungungulu, ku mu ranza, ni ku mu tirela hi kutsumbeka. A tshinya legi ga nayo go sangula gi fanele ku alakanyiwa ka ziboho za hina zontlhe. (Mavingu 3:6) Lava va lanzelako a tshinya legi ga nayo va maha vanghana va Nungungulu, va tlhela va kuma litsako la lisine ni wutomi ga pinzukelwa. — Gonza Mateu 22:36-38.

A tshinya ga nayo ga wumbiri gi nga hi maha hi zwanana ni vanwani. (1 Va Le Korinte 13:4-7) A ku tirisa a tshinya legi ga nayo ga wumbiri zi patsa ku pimanyisa a ndlela leyi Nungungulu a tirisanako hi yona ni vanhu. — Gonza Mateu 7:12; 22:39, 40.

A matshinya ya milayo ya Biblia ma gonzisa mingango a ndlela ya kuva yi bohana hi liranzo. (Va Le Kolosi 3:12-14) A Mhaka ya Nungungulu yi tlhela yi vikela mingango hi ku yi gonzisa a tshinya ginwani ga nayo—ga lezaku lava va tekanako a va faneli ku hambana. — Gonza Genesisi 2:24.

Hi ku lanzela a tigonzo ta Biblia, ha zi kota ku ti vikela hi tlhelo ga nyama ni ga maalakanyo. Hi xikombiso, a vatholi va ranza a vatiri lava va hanyako hi matshinya ya milayo ya Biblia ya kutsumbeka ni kutikarata. (Mavingu 10:4, 26; Maheberu 13:18) A Mhaka ya Nungungulu kambe yi hi gonzisa ku eneliswa hi zilo lezi zi nga xilaveko hi tlhela hi nyika nguvu lisima a kuzwanana ka hina na Nungungulu a ku hunza titshomba. — Gonza Mateu 6:24, 25, 33; 1 Timote 6:8-10.

A ku hanya hi matshinya ya milayo ya Biblia zi nga vikela a wutomi ga hina. (Mavingu 14:30; 22:24, 25) Hi xikombiso, a ku lanzela a nayo wa Nungungulu xungetano hi ku nganwi byala ku hunza mpimo za hi vikela ka mababyi ni timhango. (Mavingu 23:20) Jehova wa hi vumelela kunwa byala kanilezi na hi hi ni kuringanisela. (Tisimu 104:15; 1 Va Le Korinte 6:10) A matshinya ya milayo ya Nungungulu ma hi vuna hi ku hi gonzisa ku ti wonela ka mahanyela ya hina ni ka maalakanyo ya hina. (Tisimu 119:97-100) Hambulezo, a maKristu ya lisine a ma lanzeli a matshinya ya milayo ya Nungungulu hi ku lava ku vuneka ntsena. Wona ma maha lezo kasi ku dumisa Jehova. — Gonza Mateu 5:14-16.