XIGONZO 5
Hi gihi a kungo ga Nungungulu xungetano hi misava?
1. Hikuyini Nungungulu a vangileko misava?
Jehova i lo nyika misava a vavanuna ni vavasati. Hina hi mahelwe ku tshama laha misaveni. Hikwalaho, a patswa wo sangula wa vanhu, Adamu na Eva, a wu vangelwangi ku hanya tilweni—Nungungulu i wa sina a vangile tingelosi lezaku ti hanya le tilweni. (Joba 38:4, 7) Kanilezi, Nungungulu i lo teka a wanuna wo sangula a mu veka ka paradise go tsakisa nguvu gi vitwako simu ga Edeni. (Genesisi 2:15-17) Jehova i lo nyika yena ni vana lava a nga wa ta pswala a wuzikoti ga ku hanya kala kupinzuka misaveni. — Gonza Tisimu 37:29; 115:16.
Kusanguleni, ku wa hi simu ga Edeni ntsena gi nga hi paradise. A patswa wo sangula wa vanhu wu wa fanele ku pswala vana wu tata misava. Hi kufamba ka xikhati, va wa fanele ku fumela a misava yontlhe va tlhela va yi maha paradise. (Genesisi 1:28) A misava cima yi nga ta loviswa. Yi tava muti wa vanhu kala kupinzuka. — Gonza Tisimu 104:5.
Wona a vhidhyu Hikuyini Nungungulu a vangileko misava?
2. Hikuyini a misava yi nga hiko paradise zezi?
Adamu na Eva a va ingisangi Nungungulu, hikwalaho Jehova i lo va hlongola sinwini lego. A paradise gi lo lahleka, niku a ku na munhu a tshukileko a zi kota ku gi vuxa. A Biblia gi ngalo: “A misava yi nyikilwe canjeni ga va kubiha.” — Joba 9:24. — Gonza Genesisi 3:23, 24.
Xana Jehova i lo tsanzeka ku tatisa a kungo gakwe xungetano hi vanhu? Ahihi! Jehova i nyamintamu. A nge tsanzeki. (Isaya 45:18) Yena i ta tlhelisela vanhu ka xiyimo lexi a nga lavile lezaku vava ka xona kusanguleni. — Gonza Tisimu 37:11, 34.
3. Xana a Paradise gi ta vuxiswa kuyini?
A Paradise gi ta vuxiwa misaveni xikhatini xa kufuma ka Jesu kota Hosi ya Nungungulu. Ka yimpi yi vitwako Har–Magedoni, Jesu i ta rangela tingelosi ta Nungungulu kasi ku lovisa vontlhe lava va ti mahako valala va Nungungulu. Anzhako ka lezo, Jesu i ta khotsela Satani hi 1.000 wa malembe. A vanhu va Nungungulu va ta pona hakuva Jesu i ta va rangela ni ku va vikela. Vona va ta kuma wutomi ga pinzukelwa ka Paradise misaveni. — Gonza Kuvululelwa 20:1-3; 21:3, 4.
4. Xana a kuxaniseka ku ta mbhela rini?
Xana Nungungulu i ta mbheta rini a kubiha misaveni? Jesu i nyikile “xiwoniso” kasi ku komba xikhati lexi a kugumesa ku nga wa tava kusuhani. A xiyimo xa misava inyamutlha xi veka mhangweni a wutomi ga vanhu xi tlhela xi komba lezaku hi hanya ‘kugumeseni ka tiko’ kutani ka mafambisela ya zilo. — Gonza Mateu 24:3, 7-14, 21, 22.
A xikhati lexi a to fumela misava hi 1.000 wa malembe na a hi le tilweni, Jesu i ta mbheta a kuxaniseka kontlhe. (Isaya 9:6, 7; 11:9) Ahandle ka ku tira kota Hosi, Jesu i ta tira kota Mupristi wa Hombe a tlhela a tsetselela a zionho za lava va ranzako Nungungulu. Hikwalaho, hi ku tirisa Jesu, Nungungulu i ta fuvisa a mababyi, kukhosahala, ni kufa. — Gonza Isaya 25:8; 33:24.
5. Himani a to hanya Paradiseni legi gi tako?
Le Salawini ya Mufumo, u ta ya kuma vanhu va ranzako Nungungulu na va lava ku gonza ndlela ya ku mu tsakisa
A vanhu lava va ingisako Nungungulu hi vona va to hanya Paradiseni. (1 Johani 2:17) Jesu i lo rumela valanzeli vakwe lezaku va famba va hlota a vanhu vo rula va tlhela va va gonzisa a ndlela ya kuva va amukeleka ka Nungungulu. Inyamutlha, Jehova i longisela vanhu va timiliyoni lezaku va hanya Paradiseni legi gi tako misaveni. (Zefania 2:3) Lomu tiSalawini ta Mufumo ta Timboni ta Jehova, a vanhu va gonza kuva vanuna ni vararu va va nene ni kuva vasati ni vamamani va va nene. A vana ni vapswali va khozela zinwe va tlhela va gonza a ndlela ya kuva va vuneka hi mahungu yo saseka. — Gonza Mika 4:1-4.
