A kubiha misaveni ku sangulile a xikhati lexi Satani a nga hemba a wunwa go sangula. A kusanguleni Satani i wa hi ngelosi yo mbhelela, kanilezi ‘a nga yimangi zineneni.’ (Johani 8:44) Yena i lo navela ku khozelwa, lezi hi nayo zi lumbako Nungungulu ntsena. Satani i lo hembela Eva, a wasati wo sangula, a tlhela a mu kuca a ku ingisa yena wutshanwini ga ku ingisa Nungungulu. Adamu i lo ti patsa na Eva kuhluwukeni mahlweni ka Nungungulu. A xiboho xa Adamu xi lo neha kuxaniseka ni kufa. — Gonza Genesisi 3:1-6, 19.

A xikhati lexi Satani a nga kuca Eva lezaku a nga ingisi Nungungulu, i lo maha wo sangula a ku hluwukela a wuhosi ga Nungungulu, kutani xikhundla xakwe kota a Hunzeleleko Kutlakuka. A kutala ka vanhu va ti patsile na Satani va ala Nungungulu kota Mufumeli wabye. Hi ndlela leyo, Satani i lo maha “hosana ya tiko.” — Gonza Johani 14:30; 1 Johani 5:19.

A mitiro yontlhe ya Nungungulu yi mbhelele. A tingelosi ni vanhu lava Nungungulu a va vangileko va wa zi kota ku ingisa Nungungulu hi kumbhelela. (Deuteronome 32:4, 5) Nungungulu i hi vangile na hi hi ni kutlhatlheka ka ku hlawula ku maha za zi nene kutani zo biha. A kutlhatlheka loko ku hi vululela ndlela ya ku kombisa a liranzo la hina hi Nungungulu. — Gonza Jakobe 1:13-15; 1 Johani 5:3.

Jehova wa vumelela vanhu lezaku va hluwukela a wuhosi gakwe hi xikhati xo kari. Hikuyini? Kasi ku komba lezaku a ku na mizamo ya ku fuma handle ka wurangeli gakwe leyi yi zi kotako ku vuna vanhu. (Mutshawuteli 7:29; 8:9)  Anzhako ka 6.000 wa malembe ya matimu ya vanhu, a mhaka leyi yi dlunyatekile khwatsi. A vafumeli va vanhu a va zi koti ku fuvisa tiyimpi, wugevenga, kubiha, kutani mababyi. — Gonza Jeremia 10:23; Va Le Roma 9:17.

A ku hambana ni kufuma ka vanhu, a kufuma ka Nungungulu ka vuna lava va ku vumelako. (Isaya 48:17, 18) Lokuloku, Jehova i ta fuvisa a mifumo yontlhe ya vanhu. A vanhu lava va hlawulako ku fumiwa hi Nungungulu hi vona voce va to hanya misaveni. — Isaya 11:9. — Gonza Danieli 2:44.

Wona a vhidhyu Hikuyini Nungungulu a vhumelelako kuxaniseka?

Satani i wulile lezaku a ku na munhu a nga wa ta tirela Jehova hi ku mu ranza. A wu zi lavi ku kaneta a wunwa lego? U nga zi kota! A lihlaza-mbilu la Nungungulu la hi vumelela hontlheni a ku komba lezaku hi tsakela ku fumelwa hi Nungungulu kutani hi vanhu ke. Hi kombisa a kuhlawula ka hina hi mahanyela ya hina. — Gonza Joba 1:8-12; Mavingu 27:11.

Hi nga hlawula Nungungulu kota Mufumeli wa hina hi ku gonza hi tlhela hi hlengela wukhozelini ga lisine gi seketelwako Mhakeni ya Nungungulu, a Biblia. (Johani 4:23) Ha zi kota ku ala Satani kota mufumeli wa hina hi ku nga ti ngheniseli ka wupolitika ni ka tiyimpi, kota lezi Jesu a zi mahileko. — Gonza Johani 17:14.

Satani i tirisa a ntamu wakwe kasi ku vuvumisa a mahanyela ma nga hlazekangiko ni ya mhango. Loku hi ala a mahanyela lawo, a vanghana vo kari va hina ni maxaka va nga ha hi tseketsela kutani ku hi kaneta. (1 Pedro 4:3, 4) Hikwalaho, hi fanele ku hlawula. Xana hi ta maha wunghana ni vanhu va ranzako Nungungulu? Xana hi ta ingisa a milayo yakwe ya wutlhari ni ya liranzo? Loku hi maha lezo, hi ta komba lezaku Satani i wo hemba a xikhati lexi a nga wula lezaku a ku na munhu a nga wa ta maha lezi Nungungulu a zi lavako loku a yimisana ni zikarato. — Gonza 1 Va Le Korinte 6:9, 10; 15:33.

A liranzo la Nungungulu hi vanhu li hi tiyisa lezaku a kubiha ni kuxaniseka zi ta mbhela. Lava va kombisako lezaku va kholwa a mhaka leyi va ta hanya misaveni kala kupinzuka. — Gonza Johani 3:16.