A ku hambana ni vanhu vanwani, Jesu i hanyile tilweni kota munhu wa moya na a nga se ta pswaliwa misaveni. (Johani 8:23) Hi yena a xivangwa xo sangula xa Nungungulu, niku i vunetele kuvangiweni ka zilo zontlhe lezi zinwani. Hi yena ntsena a vangilweko hi Jehova wutsumbu niku hikwalaho i vitanwa hi kufaneleko lezaku i N’wana “a belekilweko yece” wa Nungungulu. (Johani 1:14) Jesu i tirile kota Muwulawuli wa Nungungulu, hikwalaho i vitanwa kambe lezaku i “Gezu.” — Gonza Mavingu 8:22, 23, 30; Va Le Kolosi 1:15, 16.

Nungungulu i lo rumela N’wana wakwe misaveni hi ku rurisa a wutomi gakwe le tilweni a gi yisa rumbyini ga nhwana wa muJuda a vitwako Maria. Hikwalaho Jesu a nga vangi ni raru wa nyama. (Luka 1:30-35) Jesu i tile misaveni kasi (1) ku ta gonzisa lisine xungetano hi Nungungulu, (2) a hi vekela xikombiso xa lezi hi nga mahisako zona a kuranza ka Nungungulu hambu loku hi yimisana ni zikarato, ni (3) ku nyikela a wutomi gakwe go mbhelela kota “nzhiho.” — Gonza Mateu 20:28.

A nzhiho i ntsengo wu hakhelwako kasi ku tlhatlhisa munhu ka nzhingo wa kufa. (Eksodusi 21:29, 30) A kufa ni kukhosahala zi wa nga mahi xipanze xa kungo go sangula ga Nungungulu xungetano hi vanhu. Hi zi tivisa kuyini lezo? Nungungulu i lo byela a wanuna wo sangula, Adamu, lezaku loku a maha lezi a Biblia gi nge ngalo “kuonha,” i wa tafa. Hikwalaho  loku Adamu i wa nga onhangi, cima na a nga fangi. (Genesisi 2:16, 17; 5:5) Mayelano ni Biblia, a kufa ku ‘nghenile’ vanhwini hi kota ya Adamu. Hizalezo, Adamu i lo hunzisela a pswalo wakwe wontlhe a xionho ni tsayiselelo ya xona, ku nga kufa. Hi na ni xilaveko xa nzhiho lezaku wu hi tlhatlhisa ka tsayiselelo ya kufa leyi hi hunziselweko hi Adamu. — Gonza Va Le Roma 5:12; 6:23.

Himani a nga wa ta hakhela a nzhiho lezaku hi tlhatlhiswa kufeni? A xikhati lexi hi fako, ho hakhela a tsayiselelo ya zionho za hina wutsumbu ntsena. A ku na munhu a nga mbhelelangiko a zi kotako ku hakhela a zionho za vanwani. — Gonza Tisimu 49:7-9.

A ku hambana na hina, Jesu i wa mbhelele. Hikwalaho i wa nga hi na xilaveko xa ku fela zionho zakwe—a nga zangi a onha. A wutshanwini ga lezo, Jesu i lo fela a zionho za vanwani. Nungungulu i lo kombisa liranzo la hombe nguvu hi vanhu hi ku rumela a N’wana wakwe lezaku a ta hi fela. Jesu yenawu i kombisile liranzo hi hina hi ku ingisa a Dadani wakwe ni ku nyikela a wutomi gakwe hi kota ya zionho za hina. — Gonza Johani 3:16; Va Le Roma 5:18, 19.

Wona a vhidhyu Hikuyini Jesu a fileko?

A xikhati a nga hi laha misaveni, Jesu i hanyisile vababyi, a vuxa vafileko, a tlhela a tlhatlhisa vanhu va nga hi ka timhango to tshisa. Hi ku maha lezo, yena i lo kombisa lezi a to mahela vanhu vontlhe va ingisako xikhatini xi tako. (Mateu 15:30, 31; Johani 5:28) Anzhako ka ku Jesu a file, Nungungulu i lo mu vuxa kota munhu wa moya. (1 Pedro 3:18) Zalezo, Jesu i lo ya rinzela tlhelweni ga xinene ga Nungungulu kala Jehova a mu nyika a ntamu wa ku fumela misava yontlhe kota Hosi. (Maheberu 10:12, 13) Zalezi Jesu o fuma kota Hosi le tilweni, niku a valanzeli vakwe va huwelela a mahungu lawo yo saseka misaveni yontlhe. — Gonza Danieli 7:13, 14; Mateu 24:14.

Lokuloku, Jesu i ta tirisa a ntamu wakwe kota Hosi kasi ku fuvisa a kuxaniseka kontlhe ni lava va ku vangako. Vontlhe lava va kholwako ka Jesu va tlhela va mu ingisa va ta hanya paradiseni laha misaveni. — Gonza Tisimu 37:9-11.