XIGONZO 2
Himani Nungungulu?
1. Hikuyini hi faneleko ku khozela Nungungulu?
A Nungungulu wa lisine hi Muvangi wa zilo zontlhe. A nga vangi ni masangulo niku cima a nga tava ni magumo. (Tisimu 90:2) Hi yena xibuka xa mahungu yo saseka ma nga lomu ka Biblia. (1 Timote 1:11) Kota lezi Nungungulu a hi nyikileko wutomi, hi fanele ku khozela yena yece. — Gonza Kuvululelwa 4:11.
2. I tshamisile kuyini Nungungulu?
A ku na munhu a nga tshuka a wona Nungungulu hakuva yena i Moya, lezi zi wulako lezaku yena munhu a tlakukileko a ku hunza a zivangwa za nyama lezi zi hanyako misaveni. (Johani 1:18; 4:24) Hambulezo, ha zi kota ku pola a matshamela ya Nungungulu hi ku wona a zilo lezi a zi vangileko. Hi xikombiso, a kuhambanahambana ka mihanzu ni zitsangi ku hi komba a liranzo lakwe ni wutlhari gakwe. A wuhombe ga wuako gontlhe gi hi komba a ntamu wakwe. — Gonza Va Le Roma 1:20.
Ha zi kota ku gonza zinwani kambe xungetano hi wumunhu ga Nungungulu hi ku lera a Biblia. Hi xikombiso, gona gi hi byela lezi Nungungulu a zi ranzako ni lezi a nga zi ranziko, lezi a tirisanisako zona ni vanhu, ni lezi a hlamulisako zona ka ziyimo zo hambanahambana. — Gonza Tisimu 103:7-10.
3. Xana Nungungulu i na ni vito?
Jesu i te: “Dadani wa hina wa le tilweni, a vito ga wena a gi hlawuliwe.” (Mateu 6:9) Hambu lezi Nungungulu a nga ni zikhundla zo tala, ova ni vito ginwe ntsena. Ka lirimi linwe ni linwani, gi wuliwa hi ndlela yo hambana. Hi xiTshwa gi wuliwa a ku “Jehova.” — Gonza Tisimu 83:18.
A vito ga Nungungulu gi susilwe ka maBiblia yo tala gi valetwa hi zikhundla “Hosi” kutani “Nungungulu.” Kanilezi a xikhati lexi a Biblia gi nga tsaliwa, a vito ga Nungungulu gi wa kumeka a xipimo xa 7.000 wa makhati. Jesu i tivekisile a vito ga Nungungulu a xikhati lexi a nga gonzisa vanhu xungetano hi Nungungulu. — Gonza Johani 17:26.
Wona vhidhyu Nungungulu i na ni vito?
4. Xana Jehova wa khatala hi hina?
A ku fana ni raru loyi wa liranzo, Nungungulu wa karateka hi kuxaniseka ka hina
Xana a kuenzeleka ka kuxaniseka ku wula lezaku Jehova i Nungungulu a nga khataliko hi hina? A vanhu vo kari ve ngalo Jehova o hi xanisa kasi ku hi ringa, kanilezi lezo a hi lisine. — Gonza Jakobe 1:13.
Nungungulu i nyikile vanhu a lungelo ga kutihlawulela. Xana a hi tsaki hi kuva hi tlhatlhekile ku hlawula ku tirela Nungungulu? (Joxua 24:15) Kanilezi a vanhu vo tala va hlawula ku mahela vanwani a zilo zo biha, hikwalaho a kuxaniseka ka enzeleka. Jehova wa bayiseka hi ku wona a kubiha loko. — Gonza Genesisi 6:5, 6.
Jehova i Nungungulu a khatalako hi hina. Yena i lava lezaku hiva ni wutomi go tsakisa. Lokuloku yena i ta fuvisa a kuxaniseka ni lava va ku vangako. Ka xikhati lexi, i na ni xigelo xi nene xa ku vumelela a kuxaniseka hi xikhati xo kari. Ka Xigonzo 8, hi ta gonza a ku hi xihi a xigelo xa kona. — Gonza 2 Pedro 2:9; 3:7, 13.
5. Hi nga tshinelisa kuyini ka Nungungulu?
Jehova wa hi ramba lezaku hi tshinela ka yena hi ku wulawula naye hi mukhongelo. Yena wa khatala hi munwe ni munwani wa hina. (Tisimu 65:2; 145:18) I ti yimisele ku hi tsetselela. Yena wa ku wona a kutikarata ka hina ka ku lava ku mu tsakisa, hambu loku hi tshuka hi phazama. Hikwalaho, hambu lezi hi nga mbhelelangiko, ha zi kota kuva ni kuzwanana ka hombe na Nungungulu. — Gonza Tisimu 103:12-14; Jakobe 4:8.
Kota lezi Jehova a nga hi nyika wutomi, hi fanele ku mu ranza nguvu a ku hunza ni wihi munhu munwani. (Marku 12:30) A xikhati lexi u kombisako a liranzo la wena ka Nungungulu hi ku simama ku gonza xungetano hi yena ni ku maha lezi a zi lavako, u ta tshinela nguvu ka yena. — Gonza 1 Timote 2:4; 1 Johani 5:3.