Nungungulu i lo tlhanganyisa a vana va Abrahama lezaku va maha tiko a tlhela a va nyika milayo. I lo vitana a tiko lego hi vito ga “Israeli” a tlhela a gi tirisela ku tivekisa a wukhozeli ga lisine ni mhaka yakwe. (Tisimu 147:19, 20) Hi ndlela leyo, a vanhu va matiko wontlhe va wa ta vuneka hi Israeli. — Gonza Genesisi 22:18.

Nungungulu i hlawulile vaIsraeli lezaku va maha timboni takwe. A matimu yabye ya kale ma nyika xikombiso xa lezi a vanhu va vunekisako zona hi ku ingisa a milayo ya Nungungulu. (Deuteronome 4:6) Hi ndlela leyo, a vanwani vanhu va zi kotile ku tiva Nungungulu wa lisine hi kota ya vaIsraeli. — Gonza Isaya 43:10, 12.

Hi kufamba ka xikhati, a vaIsraeli va lo zangarisa Nungungulu, zonake Jehova a valeta a tiko lego hi bandla ga wuKristu. (Mateu 21:43; 23:37, 38) Inyamutlha, a maKristu ya lisine ma tira kota timboni ta Jehova wutshanwini ga vaIsraeli. — Gonza Mitiro 15:14, 17.

Jesu i lo xaxameta a valanzeli vakwe lezaku va xumayela ni ku maha vapizani matikweni wontlhe. (Mateu 10:7, 11; 24:14; 28:19, 20) A ntiro lowo wuya wu chikela magumo masikwini lawa, lezi hi nga kugumeseni ka mafambisela lawa ya zilo. Hi khati go sangula matinwini wontlhe, Jehova i tlhanganyisa timiliyoni ta vanhu va matiko wontlhe wukhozelini ga lisine. (Kuvululelwa 7:9, 10) A maKristu ya lisine ma xaxametilwe kasi ku tiyisana ni ku vunana. Misaveni yontlhe, wona ma tirisa a longoloko wa wunwe wa gonziselelo ya Biblia mitlhanganweni ya wona. — Gonza Maheberu 10:24, 25.

Hi va 1870, ku lo humelela a ntlawanyana wa zigonzani za Biblia lowu wu nga sangula ku pola a zinene za Biblia zi nga lahlekile kale. Va wa zi tiva lezaku Jesu i wa xaxametile a bandla ga wuKristu kasi ku xumayela, hikwalaho va lo sangula tsima ga ku xumayela a Mufumo misaveni yontlhe. Hi 1931 va lo ti chula a vito ga Timboni ta Jehova. — Gonza Mitiro 1:8; 2:1, 4; 5:42.

Ka zana ga malembe go sangula, a mabandla ya wuKristu ya kutala ka matiko ma wa vuneka hi kuva ni hubye yi fumako leyi yi nga kari yi wona Jesu kota Hloko ya bandla. (Mitiro 16:4, 5) Hi kufanana inyamutlha, a Timboni ta Jehova misaveni yontlhe ta vuneka hi kuva ni Hubye yi Fumako ya madota ma buvileko. Yona yi wonelela a tihofisa ta maravi ta Timboni ta Jehova leti ti hunzuluselako, ti gandla, ti tlhela ti avanyisela mabhuku ya ku gonzisa a Biblia hi tirimi ta ku hunza 600. Hi ndlela leyo, a Hubye yi Fumako ya zi kota ku tiyisa ni ku rangela mabandla ya ku hunza 100.000 misaveni yontlhe hi ku tirisa a Mitsalo. Ka bandla ginwe ni ginwani, ku na ni vavanuna va ringanelwako lava va tirako kota madota, kutani vawoneleli. A vavanuna lavo va khatalela a ntlhambi wa Nungungulu hi liranzo. — Gonza 1 Pedro 5:2, 3.

A Timboni ta Jehova ti xaxametilwe kasi ku xumayela a mahungu yo saseka ni ku maha vapizani. A ku fana ni vapostoli, hi xumayela hi muti ni muti. (Mitiro 20:20) Ha ti hendleleta kambe lezaku hi gonza a Biblia ni vanhu va ranzako a zinene hi mbilu yontlhe. Kanilezi, a hi ku a Timboni ta Jehova tova hlengeletano ntsena. Hina hi ngango wu nga ni Dadani wa liranzo. Hina hi vamakabye va xinuna ni va xisati lava va khatalelanako. (2 Va Le Tesalonika 1:3) Hi kota ya lezi a vanhu va Jehova va xaxametilweko kasi ku tsakisa Nungungulu ni ku vuna vanwani, vona va wumba a ngango wa kutsaka nguvu kuhunza yontlhe misaveni. — Gonza Tisimu 33:12; Mitiro 20:35.